Raayan: റിലീസിനൊരുങ്ങി `രായൻ`; ധനുഷ് ചിത്രത്തിന്റെ പുതിയ പോസ്റ്റർ പുറത്തിറക്കി

ധനുഷ് നായകനായി ഉടൻ പ്രദർശനത്തിന് എത്തുന്ന ചിത്രമാണ് രായൻ. സംവിധായകനായും നായകനായും ധനുഷ് എത്തുന്നുവെന്ന പ്രത്യേകതയും ചിത്രത്തിനുണ്ട്. സൺ പിക്ചേഴ്സാണ് ചിത്രം നിർമിക്കുന്നത്. ജൂൺ 26ന് ചിത്രം പ്രദർശനത്തിനെത്തും. ചിത്രത്തിന്റെ പുതിയ  പോസ്റ്റർ പുറത്ത് വിട്ടിരിക്കുകയാണ് അണിയറ പ്രവർത്തകർ ഇപ്പോൾ.

സൺ പിക്ചേഴ്സിന്റെ ഇൻസ്റ്റ​ഗ്രാം പേജിലൂടെയാണ് പോസ്റ്റർ പുറത്തിറക്കിയിരിക്കുന്നത്. ചിത്രം ​ഗോകുലം മൂവീസാണ് കേരളത്തിൽ പ്രദർശനത്തിനെത്തിക്കുന്നതെന്നാണ് റിപ്പോർട്ട്. മലയാളത്തിൽ നിന്ന് അപർണ ബാലമുരളി, നിത്യ മേനൻ, കാളിദാസ് ജയാം എന്നിവരും അഭിനയിക്കുന്നു. സുന്ദീപ് കിഷൻ, വരലക്ഷ്മി ശരത്കുമാർ, ദുഷ്റ വിജയൻ, എസ്ജെ സൂര്യ, പ്രകാശ് രാജ്, സെൽവരാഘവൻ എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.

ഛായാ​ഗ്രഹണം- ഓം പ്രകാശ്, സം​ഗീതം- എആർ റഹ്മാൻ, നിർമാണം- സൺ പിക്ചേഴ്സ്. എസ്ജെ സൂര്യ ചിത്രത്തിൽ വില്ലനായാണ് എത്തുന്നതെന്നാണ് റിപ്പോർട്ട്. ചിത്രത്തിന്റെ പ്രമേയത്തെക്കുറിച്ച് സൂചനകളൊന്നും അണിയറ പ്രവർത്തകർ പുറത്ത് വിട്ടിട്ടില്ല. ചിത്രത്തിൽ കുക്കായാണ് ധനുഷ് എത്തുന്നതെന്നും മുൻ അധോലോക നായകനാണെന്നും റിപ്പോർട്ടുകൾ പുറത്ത് വന്നിരുന്നു.