Rajani Kanth: സംഘിയുടെ അർത്ഥം അറിയില്ലായിരുന്നു; ഐശ്വര്യ പറഞ്ഞത് തെറ്റായി വ്യാഖ്യാനിച്ചുവെന്ന് രജനികാന്ത്

ചെന്നൈ: രജനികാന്തിന്റെ മകളും സംവിധായകയുമായ ഐശ്വര്യ രജനികാന്ത് തന്റെ അച്ഛൻ ഒരു സംഘിയല്ല എന്ന് പറഞ്ഞത് വലിയ ചർച്ചയായി മാറിയിരുന്നു. ഈ സംഭവത്തിൽ ഇപ്പോൾ പ്രതികരിച്ചിരിക്കുകയാണ് നടൻ രജനികാന്ത്. സംഘി എന്നത് ഒരു മോശം വാക്കാണെന്ന് ഐശ്വര്യ പറഞ്ഞിട്ടില്ലെന്നും ആത്മീയ വിഷയങ്ങളിൽ താൽപര്യമുള്ള തന്റെ പിതാവിനെ അങ്ങനെ മുദ്രകുത്തുന്നതിലുള്ള അനൗചിത്യമാണ് മകൾ പറഞ്ഞതെന്നുമാണ് രജനികാന്ത് പറഞ്ഞത്.

 ലാൽസലാം എന്ന സിനിമയുടെ ഓഡിയോ ലോഞ്ചിനിടെ സംസാരിക്കുന്നതിനിടയിലാണ് ഐശ്വര്യ പ്രതികരിച്ചിരുന്നത്. താനെപ്പോഴും സോഷ്യൽ മീഡിയയിൽ നിന്നും മാറി നിൽക്കുന്ന ഒരു വ്യക്തിയാണ്. എന്നാൽ ചുറ്റും നടക്കുന്ന കാര്യങ്ങളെക്കുറിച്ച് തന്റെ ടീം പറഞ്ഞു തരാറുണ്ട്. അതെല്ലാം കാണുമ്പോൾ പലപ്പോഴും ദേഷ്യം തോന്നാറുണ്ട്. തങ്ങളും മനുഷ്യരാണ്, പലരും തന്റെ അച്ഛനെ സംഘി എന്നു വിളിക്കാറുണ്ട്. അതിന്റെ അർത്ഥം ആദ്യം അറിയില്ലായിരുന്നു. 

പീന്നീട് ചിലരോട് ചോദിച്ചപ്പോഴാണ് ഒരു പ്രത്യേക പാർട്ടിയെ പിന്തുണയ്ക്കുന്നവരെയാണ് ഇങ്ങനെ വിളിക്കുന്നതെന്ന്. തന്റെ അച്ഛൻ ഒരു സംഘി അല്ലെന്നാണ് ഐശ്വര്യ പറഞ്ഞത്. ഇതു കേട്ടു കൊണ്ടിരുന്ന രജനിയുടെ കണ്ണുകൾ നിറയുന്നതും സോഷ്യൽ മീഡിയയിൽ വൈറലായി മാറിയിരുന്നു. എന്നാൽ  ഇതിന് പിന്നാലെ ഐശ്വര്യയ്ക്കും  വലിയ വിമർശനങ്ങൾ നേരിടേണ്ടി വന്നു. രാമക്ഷേത്രത്തിന്റെ പ്രാണ പ്രതിഷ്ഠാ ചടങ്ങിൽ രജനികാന്ത് പങ്കെടുത്തതിൽ വലിയ രീതിയിൽ വിമർശിക്കപ്പെട്ടിരുന്നു. അദ്ദേഹത്തെ 'സംഘി' എന്ന് വിളിക്കുകയും സോഷ്യൽ മീ‍ഡിയയിലൂടെ അധിക്ഷേപിക്കുകയും ചെയ്തിരുന്നു.