Deva Movie: ബോളിവുഡിലും ജേക്സ് ബിജോയ് മ്യൂസിക് ട്രെൻഡ്; `ദേവ`യുടെ പ്രൊമോ ടീസർ പുറത്തിറങ്ങി

ഷാഹിദ് കപൂറിനെ നായകനാക്കി മലയാളി സംവിധായകൻ റോഷൻ ആൻഡ്രൂസ് സംവിധാനം ചെയ്യുന്ന ബോളിവുഡ് ചിത്രം 'ദേവ'യുടെ പ്രൊമോ ടീസർ പുറത്തിറങ്ങി. സംഗീത സംവിധായകൻ ജേക്സ് ബിജോയിയാണ് ചിത്രത്തിന്റെ സംഗീതവും പശ്ചാത്തല സം​ഗീതവും ഒരുക്കുന്നത്. ടീസർ പുറത്തുവിട്ടതോടെ ജേക്സ് ബിജോയ് സം​ഗീതം പ്രേക്ഷക ഹൃദയങ്ങളിൽ വീണ്ടും തരം​ഗമായിരിക്കുകയാണ്.

റോഷൻ ആൻഡ്രൂസിന്റെ ആദ്യ ബോളിവുഡ് ചിത്രമാണിത്. ആക്ഷൻ ത്രില്ലർ ​വിഭാ​ഗത്തിലെത്തുന്ന ചിത്രത്തിൽ ഹൈ പ്രൊഫൈൽ കേസ് അന്വേഷിക്കുന്ന പൊലീസ് ഉദ്യോഗസ്ഥനായാണ് ഷാഹിദ് കപൂർ പ്രത്യക്ഷപ്പെടുന്നത്.

പൂജ ഹെഗ്‌ഡെയാണ് ചിത്രത്തിലെ നായിക. ടീസർ റിലീസായതോടെ മലയാളത്തിലെ ഹിറ്റ് ചിത്രമായ 'മുംബൈ പോലീസ്' എന്ന ചിത്രത്തിന്റെ റീമേക്കാണോ 'ദേവ' എന്ന ചർച്ചയും സമൂഹ മാധ്യമങ്ങളിൽ ഉയരുന്നുണ്ട്.

ജനുവരി 31ന് തിയറ്ററുകളിലെത്തുന്ന ചിത്രം സീ സ്റ്റുഡിയോസും റോയ് കപൂർ ഫിലിംസും ചേർന്നാണ് നിർമ്മിക്കുന്നത്. 'പൊറിഞ്ചു മറിയം ജോസ്', 'അയ്യപ്പനും കോശിയും', 'ജന ഗണ മന', 'പോർ തൊഴിൽ', 'കിംഗ് ഓഫ് കൊത്ത', 'സരിപോദാ ശനിവാരം', 'മെക്കാനിക് റോക്കി', 'ഹലോ മമ്മി', 'ഐഡന്റിറ്റി' എന്നീ ഹിറ്റ് സിനിമകളുടെ ജീവൻ ജേക്സ് ബിജോയിയുടെ ബിജിഎം ആണ്.

തൃശൂർ സ്വദേശിയായ അദ്ദേഹം ആദ്യമായ് സംഗീതം നൽകിയത് 2014-ൽ പുറത്തിറങ്ങിയ ഇന്ദ്രജിത്ത് ചിത്രം 'ഏയ്ഞ്ചൽസ്' ന് ആണ്. 2014 മുതൽ 2025 വരെയുള്ള 11 വർഷത്തെ കാലയളവിൽ പ്രേക്ഷക ഹൃദയങ്ങൾ കീഴടക്കിയ നിരവധി ​ഗാനങ്ങൾക്കാണ് അദ്ദേഹം സം​ഗീതം പകർന്നിരിക്കുന്നത്.

​ഗാനങ്ങൾ മാത്രമല്ല അദ്ദേഹത്തിന്റെ ബിജിഎമ്മും ട്രെൻഡിങ്ങിലാണ്. ചിത്രീകരണം പുരോ​ഗമിക്കുന്ന തരുൺ മൂർത്തി-മോഹൻലാൽ ചിത്രത്തിനും ജേക്സ് ബിജോയിയാണ് സംഗീതം ഒരുക്കുന്നത്. 'ഫോറൻസിക്', 'രണം', 'കൽക്കി', 'ഇഷ്ക്', 'പുഴു', 'കടുവ', 'കാപ്പ', 'കുമാരി', 'ഇരട്ട', എന്നിവയാണ് ജേക്സി ബിജോയ് സം​ഗീതം പകർന്ന മറ്റ് ചിത്രങ്ങൾ.