Kanguva Release Trailer: `നടിപ്പിൻ നായകന്റെ വിളയാട്ടത്തെ പാക്കലാം`; കങ്കുവ റിലീസ് ട്രെയിലർ എത്തി, ഞെട്ടിക്കാൻ കാ‍ർത്തിയും?

നടിപ്പിൻ നായകൻ സൂര്യ നായകനായെത്തുന്ന ബി​ഗ് ബജറ്റ് ചിത്രം കങ്കുവ നവംബർ 14ന് തിയറ്ററുകളിലെത്തും. ചിത്രത്തിന്റെ റിലീസ് ട്രെയിലർ അണിയറപ്രവർത്തകർ പുറത്ത് വിട്ടു. സിനിമയിൽ രണ്ട് ​ഗെറ്റപ്പുകളിലാണ് സൂര്യ എത്തുന്നത്. 

അതിനിടെ ട്രെയിലറിന്റെ അവസാനഭാ​ഗത്ത് കാണിക്കുന്ന കഥാപാത്രം കാർത്തിയെന്നാണ് സോഷ്യൽ മീഡിയയുടെ കണ്ടുപിടിത്തം. എക്സ്ട്രീം ക്ലോസപ്പിലുള്ള ആ ഷോട്ടില്‍ കഥാപാത്രത്തിന്റെ മുഖം പൂർണ്ണമായി കാണിക്കുന്നില്ലെങ്കിലും അത് കാർത്തിയാണെന്നാണ് ആരാധകർ പറയുന്നത്. ഇതിന് പുറമെ ട്രെയിലറിന്റെ മധ്യഭാഗത്തെ ഒരു എക്സ്ട്രീം ലോങ്ങ് ഷോട്ടിലും കാർത്തിയെ കാണാം എന്ന് ചിലർ പറയുന്നുണ്ട്.

ടൈം ട്രാവലിലൂടെ കഥ പറയുന്ന സയൻസ് ഫിക്ഷൻ സിനിമയാകും കങ്കുവ. ബോളിവുഡ് നടി ദിഷ പഠാനിയാണ് നീയുക. ബോബി ഡിയോളാണ് വില്ലൻ വേഷത്തിൽ എത്തുന്നത്. ബോബി ഡിയോളിന്റെ കോളിവുഡ് അരങ്ങേറ്റം കൂടിയാണ് ചിത്രം. 

സിരുത്തൈ ശിവയുടെ സംവിധാനത്തിൽ എത്തുന്ന കങ്കുവ രണ്ട് കാലഘട്ടത്തിലെ കഥയാണ് പറയുന്നത്. രണ്ട് ഭാ​ഗമായിട്ടായിരിക്കും ചിത്രം എത്തുക. കങ്കുവയെന്നത് പുരാതനമായ തമിഴ്വാക്കാണ്. തീ എന്നാണ് ഇതിന്റെ അർത്ഥം. 

യുവി ക്രിയേഷൻസിന്റെ ബാനറിൽ വംശി പ്രമോദും സ്റ്റുഡിയോ ​ഗ്രീനിന്റെ ബാനറിൽ കെഇ ജ്ഞാനവേൽ രാജയും ചേർന്നാണ് ചിത്രത്തിന്റെ നിർമാണം. ആയിരം വർഷങ്ങൾക്ക് മുമ്പുള്ള കാലഘട്ടത്തിലെ കഥ പറയുന്ന കങ്കുവയിൽ ഒരു യോദ്ധാവിന്റെ വേഷത്തിലാണ് സൂര്യ എത്തുന്നത്.

ദേവി ശ്രീ പ്രസാദ് ആണ് സംഗീതം. ഛായാഗ്രഹണം വെട്രി പളനിസാമി. ഈയിടെ അന്തരിച്ച നിഷാദ് യൂസഫാണ് എഡിറ്റിങ്. ​ഗോകുലം മൂവിസ് ആണ് ചിത്രം കേരളത്തിൽ വിതരണത്തിനെത്തിക്കുന്നത്.