The Mistaker Who: ക്യാമറയ്ക്ക് മുന്നിൽ മകൻ; പിന്നിൽ ആക്ഷനും കട്ടും പറഞ്ഞ് മാതാപിതാക്കൾ

ക്യാമറയ്ക്ക് മുന്നിൽ നായകനായി അഭിനയിക്കുന്ന മകൻ. ക്യാമറയ്ക്ക് പിന്നിൽ ആക്ഷനും കട്ടും പറഞ്ഞ് അച്ഛനും അമ്മയും. അപൂർവ്വ കാഴ്ച്ചയുടെ വിസ്മയമൊരുക്കി "ദി മിസ്റ്റേക്കർ ഹൂ?" എന്ന സസ്പെൻസ് ഹൊറർ ത്രില്ലർ ചിത്രം ഒരുങ്ങി. മായ ശിവയും ശിവ നായരുമാണ് ആ മാതാപിതാക്കൾ. മകൻ ആദിത്യദേവാണ് ചിത്രത്തിലെ ഹീറോ.

മായ ശിവ സംവിധാനം ചെയ്ത ഥൻ, മെയ്ഡ് ഇൻ ട്രിവാൻഡ്രം തുടങ്ങിയ ചിത്രങ്ങളിലെ നായക വേഷം അവതരിപ്പിച്ചതും മകൻ ആദിത്യദേവ് ആയിരുന്നു. ചിത്രത്തിന് പിന്നിലെ പ്രധാന സാങ്കേതിക കാര്യങ്ങളെല്ലാം അച്ഛനും അമ്മയും മകനും കൈകാര്യം ചെയ്യുന്നുവെന്ന സവിശേഷതയുമുണ്ട് ഈ ചിത്രത്തിന്.

തന്റെ കുടുംബത്തിന്റെ തകർച്ചയ്ക്ക് കാരണക്കാരായവരോട് പകരം ചോദിക്കാൻ ഇറങ്ങിത്തിരിക്കുന്ന നായകൻ. ആ യാത്രയിൽ അയാൾക്ക് നേരിടേണ്ടി വരുന്ന സങ്കീർണ്ണമായ പ്രശ്നങ്ങളും തുടർന്നുണ്ടാകുന്ന മാനസിക സംഘർഷങ്ങളുമാണ് ചിത്രത്തിന്റെ പ്രമേയം. തിരുവനന്തപുരത്തും പരിസരപ്രദേശങ്ങളിലുമായി ചിത്രീകരണം പൂർത്തിയാക്കി.

ചിത്രത്തിൽ ആദിത്യദേവിനെ കൂടാതെ ദയ, ആര്യ, അഡ്വ. രാജീവ് കുളിക്കിലേരി, ശ്രീലത, രമണി, രേശ്മ, ക്രിസ്റ്റീന, ജയ, രാമവർമ്മ, ബിപിൻ, ബിജു, വിനീഷ്, മണിയൻ ശ്രീവരാഹം, സുബ്രമണി എന്നിവരും അഭിനയിക്കുന്നു. ചിത്രത്തിന്റെ സാങ്കേതിക പ്രവർത്തനങ്ങളെല്ലാം മായ ശിവയും ശിവ നായരും ആദിത്യദേവും ചേർന്നാണ് ചെയ്തിരിക്കുന്നത്. പിആർഒ- അജയ് തുണ്ടത്തിൽ.