Thirimali OTT Release : തിരിമാലി മനോരമ മാക്‌സിൽ ഉടനെത്തുന്നു

Kochi : തിരിമാലി ഇന്ന്, മാർച്ച് 31  അർധരാത്രി ഒടിടി പ്ലാറ്റ്‌ഫോമിൽ റിലീസ് ചെയ്യും. മനോരമ മാക്സിലാണ് ചിത്രം എത്തുന്നത്. ചിത്രത്തിന് തീയേറ്ററുകളിൽ സമ്മിശ്ര പ്രതികരണമാണ് ലഭിച്ചത്. കോവിഡ് മൂന്നാം തരംഗവും ചിത്രത്തെ പ്രതികൂലമായി ബാധിച്ചിരുന്നു. ബിബിൻ ജോർജ്, ധർമജൻ ബോൾഗാട്ടി, ജോണി ആന്റണി എന്നിവരാണ് ചിത്രത്തിൽ കേന്ദ്ര കഥാപാത്രങ്ങളായി എത്തിയത്. രാജീവ് ഷെട്ടിയാണ് ചിത്രം സംവിധാനം ചെയ്തത്.

റിപ്പോർട്ടുകൾ അനുസരിച്ച് ചിത്രം ഉടൻ ആമസോൺ പ്രൈം വീഡിയോസിലും റിലീസ് ചെയ്‌തേക്കും. അതേസമയം നിരവധി ചിത്രങ്ങളാണ് മനോരമ മാക്‌സിൽ റിലീസ് ചെയ്യാൻ ഒരുങ്ങുന്നത്. നൈറ്റ് ഡ്രൈവ്, കള്ളൻ ഡിസൂസ, ഒരുത്തീ എന്നീ ചിത്രങ്ങളും ഉടൻ മനോരമ മാക്‌സിൽ റിലീസ് ചെയ്യും. ഈ മാസം അർച്ചന 31 നോട്ട് ഔട്ട് എന്ന ചിത്രവും മനോരമ മാക്‌സിൽ റിലീസ് ചെയ്തിരുന്നു. ചിത്രം കഴിഞ്ഞ ദിവസം ആമസോൺ പ്രൈമിലും റിലീസ് ചെയ്തിരുന്നു.

ഹിറ്റ്‌മേക്കർ  വൈശാഖ് സംവിധാനം ചെയ്ത ചിത്രമാണ് നൈറ്റ് ഡ്രൈവ്. ഇന്ദ്രജിത്ത് സുകമാരൻ, റോഷൻ മാത്യു, അന്ന ബെൻ എന്നിവർ കേന്ദ്രകഥാപാത്രങ്ങളായി എത്തിയ ചിത്രം മാർച്ച് 11 നാണ് തീയേറ്ററുകളിൽ റിലീസ്  ചെയ്തത്. ചിത്രത്തിന് തീയേറ്ററുകളിൽ മികച്ച പ്രതികരണമാണ് ലഭിച്ചത്.  ആൻ മെഗാ മീഡിയയുടെ ബാനറിൽ പ്രിയ വേണു, നീറ്റ പിന്റോ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. അഭിലാഷ്  പിള്ളയാണ് സിനിമയ്ക്ക് കഥയും തിരക്കഥയും ഒരുക്കിയിരിക്കുന്നത്. 

സൗബിൻ ഷാഹിർ കേന്ദ്ര കഥാപാത്രമായി എത്തുന്ന ചിത്രം കള്ളൻ ഡിസൂസയും മനോരമ മാക്‌സിൽ എത്തുമെന്ന് അറിയിച്ചിട്ടുണ്ട്. ചിത്രം ഫെബ്രുവരി 11 നാണ് തീയേറ്ററുകളിൽ റിലീസ് ചെയ്തത്. നവാഗതനായ ജിത്തു കെ ജയനാണ് ചിത്രം സംവിധാനം ചെയ്തത്. റംഷി അഹമ്മദ് പ്രൊഡക്ഷൻസിന്റെ ബാനറിൽ റംഷി അഹമ്മദ്‌ ആണ് ചിത്രം നിർമ്മിച്ചത്. ചിത്രത്തിൽ സൗബിൻ ഷാഹിറിനെ കൂടാതെ ദിലീഷ് പോത്തൻ, സുരഭി ലക്ഷ്മി, ഹരീഷ് കണാരൻ, വിജയ രാഘവൻ, ശ്രീജിത്ത്‌ രവി, സന്തോഷ്‌ കീഴാറ്റൂർ, ഡോ.റോയ് ഡേവിഡ്, പ്രേം കുമാർ, രമേശ്‌ വർമ്മ, വിനോദ് കോവൂർ, കൃഷ്ണ കുമാർ, അപർണ നായർ എന്നിവരും പ്രധാന കഥാപാത്രങ്ങളായിട്ടുണ്ട്.

നവ്യ നായർ ചിത്രം ഒരുത്തീയുടെ ഒടിടി അവകാശങ്ങളും മനോരമ മാക്സ് സ്വന്തമാക്കി.  ഒരു നീണ്ട ഇടവേളയ്ക്ക് ശേഷം നവ്യ നായർ അഭിനയിച്ച ചിത്രമെന്ന പ്രത്യേകത ഒരുത്തീക്കുണ്ട്. തീയേറ്ററുകളിൽ മികച്ച പ്രേക്ഷകാഭിപ്രായം നേടി ഒരുത്തീ പ്രദർശനം തുടരുകയാണ്. ഒരു ക്രൈം ത്രില്ലർ ചിത്രമാണ് ഒരുത്തീ. ഒരു സ്ത്രീയും മകനും ഒരു കുറ്റകൃത്യത്തിനിടയിൽ പെട്ട്പോകുന്നതും, അതിൽ നിന്ന് രക്ഷപ്പെടാൻ ശ്രമിക്കുന്നതുമാണ് സിനിമയുടെ ഇതിവൃത്തം. ചിത്രത്തിൽ ഒരു ബോട്ടിലെ കണ്ടക്ടറായി ആണ് നവ്യ നായരുടെ കഥാപാത്രം എത്തുന്നത്.