Vaashi Theater Response : വാശിക്ക് തീയേറ്ററുകളിൽ മികച്ച അഭിപ്രായം; പ്രേക്ഷകർക്ക് നന്ദി അറിയിച്ച് ടോവിനോ

കൊച്ചി : ടോവിനോ തോമസും കീർത്തി സുരേഷും കേന്ദ്ര കഥാപാത്രങ്ങളായി എത്തിയ ചിത്രം വാശിക്ക് തീയേറ്ററുകളിൽ നിന്ന് ലഭിക്കുന്നത് മികച്ച പ്രതികരണം. സിനിമയ്ക്ക് മികച്ച സ്വീകരണം നൽകിയ പ്രേക്ഷകർക്ക് നടൻ ടോവിനോ തോമസ് നന്ദി അറിയിച്ചു, തന്റെ ഔദ്യോഗിക ഫേസ്ബുക്ക് പേജിലൂടെയാണ് ടോവിനോ നന്ദി അറിയിച്ചത്. എല്ലായിടത്ത് നിന്നും മികച്ച പ്രതികരണമാണ് ലഭിക്കുന്നത് എല്ലാവർക്കും നന്ദിയെന്ന് ടോവിനോ ഫേസ്‌ബുക്കിൽ കുറിച്ചു.

ചിത്രം 2022  ജൂൺ 17 നാണ് തീയേറ്ററുകളിൽ റിലീസ് ചെയ്തത്. മലയാളികൾക്ക് സുപരിചിതനായ നടൻ  വിഷ്ണു ജി രാഘവ് ആദ്യമായി സംവിധാനം ചെയ്യുന്ന ചിത്രം കൂടിയാണ് വാശി. അഡ്വക്കേറ്റുമരായ എബിൻ, മാധവി എന്നിവരുടെ കഥ പറയുന്ന ഒരു കുടുംബ ചിത്രമാണ് വാശി. രേവതി കലാമന്ദിറിന്റെ ബാനറിൽ ജി.സിരേഷ് കുമാറാണ് ചിത്രം നിർമിക്കുന്നത്. സഹനിർമ്മാതാക്കളായി മേനക സുരേഷും, രേവതി സുരേഷും ഒപ്പമുണ്ട്. 

ചിത്രത്തിൻറെ സംവിധായകൻ വിഷ്ണു ജി രാഘവ് തന്നെയാണ് ചിത്രത്തിൻറെ തിരക്കഥ ഒരുക്കിയിരിക്കുന്നത്. സംവിധായകൻ മഹേഷ് നാരയണനാണ് എഡിറ്റിങ് കൈകാര്യം ചെയ്യുന്നത്.  ചിത്രത്തിൻറെ  ട്രെയ്‌ലർ ജൂൺ 14 ന് പുറത്ത് വിട്ടിരുന്നു. വൻ ജനപ്രീതി നേടാൻ ചിത്രത്തിൻറെ ട്രെയ്‌ലറിന് സാധിച്ചിരുന്നു. പ്രേക്ഷകർ  പ്രതീക്ഷയ്‌ക്കൊപ്പം ഉയരാൻ ചിത്രത്തിന് സാധിച്ചുവെന്നാണ് റിപ്പോർട്ടുകൾ  സൂചിപ്പിക്കുന്നത്.

 ഇതൊരു ഫാമിലി ഡ്രാമ വിഭാഗത്തിൽപ്പെടുന്ന ചിത്രമാണ്. കീര്‍ത്തി സുരേഷ് ചെറിയൊരു ഇടവേളയ്ക്ക് ശേഷം മലാളത്തിലേക്ക് തിരിച്ചെത്തുന്ന ചിത്രമാണ് വാശി. മരയ്ക്കാര്‍ അറബിക്കടലിന്റെ സിംഹം എന്ന ചിത്രത്തില്‍ ഒരു വേഷം ചെയ്തിരുന്നുവെങ്കിലും അത് മുഴുനീള കഥാപാത്രമായിരുന്നില്ല.  ചിത്രം വളരെ പ്രസക്തമായ ചില കാര്യങ്ങളാണ് പറയുന്നത്.

നീണ്ട ഇടവേളയ്ക്ക് ശേഷം മലയാളത്തിലെ മുൻനിര ബാനറായ രേവതി കലാമന്ദിര്‍ സിനിമ നിർമ്മാണത്തിലേക്ക് തിരിച്ചെത്തുന്ന ചിത്രമെന്ന പ്രത്യേകതയും വാശിക്കുണ്ട്. അനു മോഹനും ചിത്രത്തില്‍ ഒരു പ്രധാന കഥാപാത്രമായി എത്തുന്നു. റോബി വർഗ്ഗീസ് രാജാണ് ഛായാഗ്രാഹണം നിര്‍വഹിക്കുന്നത്.