Atul Parchure Passed Away: മറാഠി നടൻ അതുൽ പർചുരെ അന്തരിച്ചു

മുംബൈ: പ്രമുഖ മറാഠി നടന്‍ അതുല്‍ പര്‍ചുരെ അന്തരിച്ചു. 57 വയസായിരുന്നു. നിരവധി ഹിന്ദി ടെലിവിഷന്‍ ഷോകളിലും സനിമകളിലും അദ്ദേഹം അഭിനയിച്ചിട്ടുണ്ട്. നിലവിൽ അര്‍ബുദം ബാധിച്ച് ചികിത്സയിലായിരുന്നു. 

ഷാരൂഖ് ഖാന്‍ അഭിനയിച്ച ബില്ലു, പാര്‍ട്ണര്‍, അജയ് ദേവ്ഗണിന്റെ ഓള്‍ദി ബെസ്റ്റ് എന്നീ സിനിമകളിലടക്കം ഇദ്ദേഹം വേഷമിട്ടിട്ടുണ്ട്. കോമഡി റോളുകളിലൂടെയാണ് അതുല്‍ പര്‍ചുരെ ശ്രദ്ധേയനായത്. കപില്‍ ശര്‍മയുടെ കോമഡി ഷോയിലടക്കം തന്റെ കഴിവ്‌ പ്രകടിപ്പിച്ചിട്ടുണ്ട്.

ഒരു ടോക് ഷോയിലാണ് തനിക്ക് കരളില്‍ അര്‍ബുദം ബാധിച്ചിട്ടുണ്ടെന്ന കാര്യം അദ്ദേഹം വെളിപ്പെടുത്തിയത്. പ്രാരംഭ ഘട്ടത്തില്‍ ചികിത്സാ പിഴവ് ഉണ്ടായെന്നും നടക്കാനും സംസാരിക്കാനും പോലും കഴിയാത്തവിധം രോഗം മൂര്‍ച്ഛിച്ചതിന് കാരണം അതാണെന്നും നടന്‍ വെളിപ്പെടുത്തിയിരുന്നു.  കൂടാതെ ശസ്ത്രക്രിയ ചെയ്യുന്നത് കൂടുതല്‍ സങ്കീര്‍ണതകളിലേക്ക് നയിക്കുമെന്ന് ആദ്യം ചികിത്സിച്ച ഡോക്ടര്‍ അദ്ദേഹത്തോട് പറഞ്ഞിരുന്നുവെന്നും പിന്നീട് മറ്റൊരു ഡോക്ടറെ കണ്ടശേഷമാണ് കീമോതെറാപ്പി അടക്കമുള്ള ചികിത്സകളിലേക്ക് പോയതെന്നും അദ്ദേഹം വ്യക്തമാക്കിയിരുന്നു. മറാഠി വിനോദരംഗത്ത് നിരവധി ആരാധകരും സൗഹൃദങ്ങളും ഉണ്ടായിരുന്ന ഓട് നടനാണ് അതുല്‍ പര്‍ചുരെ.