Toxic Movie: സംരക്ഷിത വനഭൂമിയിൽ നിന്ന് മരങ്ങൾ മുറിച്ച് മാറ്റി; യാഷ് ചിത്രം `ടോക്സിക്` വിവാദത്തിൽ

കന്നട സൂപ്പ‍ർതാരം യഷിന്റെ ബി​ഗ്ബജറ്റ് ചിത്രം 'ടോക്സിക്' വിവാദത്തിൽ. സിനിമയുടെ ചിത്രീകരണത്തിനായി നൂറിലേറെ മരങ്ങൾ മുറിച്ചതായി ആരോപണം. ബെം​ഗളൂരുവിലെ പീന്യയിലുള്ള എച്ച് എം ടി കോംപൗണ്ടിലെ നൂറുകണക്കിന് മരങ്ങൾ സിനിമയുടെ ചിത്രീകരണത്തിനായി വെട്ടിമാറ്റിയെന്നാണ് കണ്ടെത്തൽ.

വനം വകുപ്പിന്റെ അധീനതയിലുള്ള എച്ച്എംടിയിലെ സംരക്ഷിതവനഭൂമിയിൽ നിന്നുള്ള മരങ്ങൾ മുറിച്ച് മാറ്റിയെന്നാണ് പരാതി. മരങ്ങൾ മുറിച്ച് മാറ്റിയതിന് തെളിവായി സാറ്റലൈറ്റ് ചിത്രങ്ങൾ വനം വകുപ്പ് പുറത്ത് വിട്ടു. സ്ഥലം സന്ദർശിച്ച് വിലയിരുത്തിയ  മന്ത്രി ഈശ്വ‍ർ ഖണ്ഡ്രെ സിനിമാ നി‍മാതാക്കളോട് അടിയന്തരമായി വിശദീകരണം തേടി.

അതേസമയം മരം വെട്ടിയിട്ടില്ലെന്ന് സിനിമാ നിർമാണക്കമ്പനി കെവിഎൻ പ്രൊഡക്ഷൻസ് അറിയിച്ചു. വനം വകുപ്പിന് വിശദമായ റിപ്പോ‍ർട്ട് നൽകുമെന്ന് നിർമാതാ‌വായ സുപ്രീത് വ്യക്തമാക്കി. റോക്കിം​ഗ് സ്റ്റാർ യാഷിന്റെ കരിയറിലെ പത്തൊമ്പതാമത്തെ ചിത്രമാണ് 'ടോക്സിക്'. ​ഗീതു മോഹൻദാസാണ് സംവിധാനം. 

എച്ച്എംടിയെ ചൊല്ലിയുള്ള രാഷ്ട്രീയ പോര് കടുക്കുന്നതിനിടെയാണ് പുതിയ വിവാദം. സർക്കാർ ഭൂമി എച്ച്എംടി അനധികൃതമായി തട്ടിയെടുത്തതാണെന്നും അത് തിരിച്ച് പിടിക്കുമെന്നും കോൺ​ഗ്രസ് സ‍‍ർക്കാർ പ്രഖ്യാപിച്ചിരുന്നു. എന്നാൽ എച്ച്എംടിയെ നവീകരിക്കാനുള്ള ശ്രമങ്ങൾക്ക് തുരങ്കം വയ്ക്കാനാണ് സർക്കാർ ശ്രമമെന്നാണ് കേന്ദ്രമന്ത്രി എച്ച് ഡി കുമാരസ്വാമിയുടെ ആരോപണം.