Online Sale: 95 ശതമാനം വരെ വിലക്കുറവുമായി ദുബൈയിൽ ഗ്രേറ്റ് ഓൺലൈൻ സെയിലിന് തുടക്കം

ദുബൈ: 95 ശതമാനം വരെ വിലക്കുറവുമായി ദുബൈയിൽ ഗ്രേറ്റ് ഓൺലൈൻ സെയിലിന് തുടക്കം കുറിച്ചു. മൂന്ന് ദിവസമാണ് ഈ സെയിൽ നടക്കുന്നത്. വിവിധ ഓൺലൈൻ വ്യാപാര പ്ലാറ്റ്ഫോമുകൾ ഒരുമിച്ച് അണിനിരക്കുന്ന ഈ ഷോപ്പിങ് അവസരത്തിൽ ഉപഭോക്താക്കൾക്ക് തങ്ങൾക്ക് പ്രിയപ്പെട്ട ബ്രാൻഡുകളുടെ ഉത്പന്നങ്ങൾ സ്വന്തമാക്കാനുള്ള മികച്ച അവസരം ഒരുങ്ങുകയാണ്. 

മാർച്ച് 29 ന് ആരംഭിച്ച ഗ്രേറ്റ് ഓൺലൈൻ സെയിലിൽ എഴുപതിലധികം ഓൺലൈൻ വ്യാപാരികളാണ് ഇത്തവണ  പങ്കെടുക്കുന്നത്. ഇലക്ട്രോണിക്സ് സാധനങ്ങൾ, ഫാഷൻ, കുട്ടികളുടെ വസ്ത്രങ്ങളും മറ്റ് ഉത്പന്നങ്ങളും എന്നിങ്ങനെ നിരവധി മേഖലകളിൽ നിന്നുള്ള സാധനങ്ങൾ വൻ വിലക്കുറവിൽ ഇവിടെ വാങ്ങാൻ കഴിയും. ഇതിലൂടെ ദുബൈയിലെ ജനങ്ങൾക്ക് തങ്ങളുടെ പെരുന്നാൾ ഷോപ്പിങിന് മികച്ച പ്രാദേശിക, അന്താരാഷ്ട്ര പ്ലാറ്റ്ഫോമുകളിൽ നിന്ന് ഇഷ്ട സാധനങ്ങൾ വാങ്ങാനുള്ള അവസരം ഒരുങ്ങിയതായി ഗ്രേറ്റ് ഓൺലൈൻ സെയിലിന്റെ സംഘാടകരായ ദുബൈ ഫെസ്റ്റിവൽസ് ആന്റ് റീട്ടെയിൽ എസ്റ്റാബ്ലിഷ്‍മെറ്റിലെ റീട്ടെയിൽ ആന്റ് സ്ട്രാറ്റജിക് അലയൻസ് വിഭാഗം വൈസ് പ്രസിഡന്റ് മുഹമ്മദ് ഫറാസ് വ്യക്തമാക്കി. 

പെരുന്നാളിന് സമ്മാനങ്ങൾ വാങ്ങുന്നതിനും, വീട് അലങ്കരിക്കാനും, പുതിയ ഫർണിച്ചറുകളും തുണികളും വാങ്ങാനും അങ്ങനെ എന്തൊക്കെ മനസിലുണ്ടോ  അതിനൊക്കെയുള്ള അവസരമാണിതെന്നും അദ്ദേഹം പറഞ്ഞു.