UAE: ആഗോളതലത്തിൽ എണ്ണവില കൂടി; രാജ്യത്ത് പുതിയ ഇന്ധനവില പ്രഖ്യാപിച്ച് യുഎഇ

അബുദാബി: ആഗോളതലത്തിൽ എണ്ണവില കൂടിയതിന്റെ  അടിസ്ഥാനത്തിൽ യുഎഇയിലും പെട്രോൾ ഡീസൽ വില വർധിപ്പിച്ചു. അർധരാത്രി മുതലാണ് വിലവർധനവ് നടപ്പിലാക്കിയത്. ഇന്ധന വില തീരുമാനിക്കുന്ന സമിതിയാണ് യുഎഇയിൽ 2024 മാർച്ചിലെ പുതിയ ഇന്ധന നിരക്കുകൾ പ്രഖ്യാപിച്ചത്. 

ഇക്കുറി എല്ലാ വിഭാഗങ്ങളിലും കാര്യമായ വർദ്ധനവാണ് ഉള്ളത്. അന്താരാഷ്ട്ര എണ്ണ വിപണിയിൽ സംഭവിച്ചുകൊണ്ടിരിക്കുന്ന ഏറ്റക്കുറച്ചിലുകളും പ്രാദേശിക ഇന്ധന വില നിർണ്ണയത്തെ ബാധിച്ചിട്ടുണ്ടെന്നാണ് ഇന്ധന വില തീരുമാനിക്കുന്ന സമിതി വ്യക്തമാക്കിയത്. യുഎഇ ഇന്ധനവില നിര്‍ണയ സമിതി നിശ്ചയിച്ച പുതിയ വില ഇപ്രകാരം സൂപ്പർ 98 പെട്രോൾ ലിറ്ററിന് 3.03 ദിർഹം നൽകേണ്ടിവരും.  ഫെബ്രുവരി മാസത്തിൽ യുഎഇയിൽ സൂപ്പർ 98 പെട്രോൾ ലിറ്ററിന് 2.88 ദിർഹമായിരുന്നു വില. സ്പെഷ്യൽ 95 പെട്രോളിനാകട്ടെ പുതിയ വില പ്രകാരം ലിറ്ററിന് 2.92 ദിർഹമാണ്. കഴിഞ്ഞ മാസം 2.76 ദിർഹമായിരുന്നു സ്പെഷ്യൽ 95 പെട്രോളിന് നൽകേണ്ടിയിരുന്നത്.  ഇ - പ്ലസ് കാറ്റഗറി പെട്രോൾ ലിറ്ററിന്‍റെ വില 2.69 ദിർഹത്തിൽ നിന്ന് 2.85 ദിർഹമാക്കി യുഎഇ ഇന്ധനവില നിര്‍ണയ സമിതി ഉയർത്തിയിട്ടുള്ളത്. 

ഡീസലിന്‍റെ കാര്യത്തിലും കാര്യമായ വർധനവുണ്ട്. ഡീസൽ വില ലിറ്ററിന് 2.99 ദിർഹത്തിൽ നിന്ന് 3.16 ദിർഹക്കിയാണ് യുഎഇ ഇന്ധനവില നിര്‍ണയ സമിതി പുതുക്കി നിശ്ചയിച്ചിരിക്കുന്നത്. 2024 ഫെബ്രുവരിയിൽ ഒരു ബാരൽ എണ്ണയുടെ വില ഗണ്യമായി കുതിച്ചുയർന്നെന്നും ആഗോള എണ്ണ വിപണിയുടെ ട്രെൻഡുകൾക്ക് അനുസൃതമായാണ് വിലനിർണ്ണയ മാറ്റമെന്നും യുഎഇ ഇന്ധനവില നിര്‍ണയ സമിതി വ്യക്തമാക്കിയിട്ടുണ്ട്.