Saudi Arabia: ഈന്തപ്പഴത്തിൽ നിന്ന് കോളയോ? ശീതള പാനീയ വിപണിയിലേക്ക് സ്വന്തം ഉൽപ്പന്നവുമായി സൗദി!

റിയാദ്: ശീതള പാനീയ വിപണിയിലേക്ക് സ്വന്തം ഉൽപ്പന്നവുമായി സൗദി അറേബ്യ രംഗത്ത്. ഈന്തപ്പഴത്തിൽ നിന്ന് വേർതിരിച്ചെടുത്ത ആദ്യ ശീതള പാനീയമായ ‘മിലാഫ് കോള’യാണ് സൗദി അറേബ്യ പുറത്തിറക്കിയിരിക്കുന്നത്. 

അന്താരാഷ്ട്ര വിപണിയിലെ പ്രമുഖ ശീതള പാനീയ ബ്രാൻഡുകളുമായി മത്സരിക്കുന്ന രാജ്യാന്തര ഉൽപ്പന്നമായാണ് സൗദി പൊതുനിക്ഷേപ ഫണ്ടിന്‍റെ ഉടമസ്ഥതയിലുള്ള ‘തുറാസ് അൽമദീന കമ്പനി’ മിലാഫ് കോള പുറത്തിറക്കിയിരിക്കുന്നത്. അന്താരാഷ്ട്ര ഭക്ഷണ നിലവാരം അനുസരിച്ചാണ് ഇത് തയ്യാറാക്കിയിരിക്കുന്നത്.

റിയാദിൽ നടന്ന വേൾഡ് ഓഫ് ഡേറ്റ്സ് എക്സിബിഷനിൽ മിലാഫ് കോളയുടെ ലോഞ്ചിങ് നടന്നു. പ്രാദേശിക വിപണിയിൽ ഇത് ഉടൻ ലോഞ്ച് ചെയ്യുമെന്നാണ് റിപ്പോർട്ട്. ‘മിലാഫ്’ ബ്രാൻഡിലൂടെ നിരവധി ഉൽപ്പന്നങ്ങൾ പുറത്തിറക്കാനും സൗദി ഈന്തപ്പഴവുമായി ബന്ധപ്പെട്ട ഉൽപ്പന്നങ്ങൾ വൈവിധ്യവത്കരിക്കാനുള്ള ശ്രമങ്ങളുടെ ഭാഗമായാണിത്. ലോകമെമ്പാടുമുള്ള ശീതളപാനീയങ്ങളിലേക്ക് ഒരു പ്രധാന കൂട്ടിച്ചേർക്കലായിരിക്കും ഈ ‘മിലാഫ് കോള’.

അതിന്‍റെ ഉപഭോഗ അളവും വരുമാനവും ഉയർന്നതാകുമെന്നാണ് കമ്പനിയുടെ പ്രതീക്ഷ. രാജ്യത്ത് ഈന്തപ്പഴങ്ങളുടെ മൂല്യം ഉയർത്തുന്നത് കമ്പനിയുടെ ഏറ്റവും പ്രധാനപ്പെട്ട പദ്ധതികളിലൊന്നാണെന്ന് തുറാസ് അൽമദീന കമ്പനി സിഇഒ എൻജി. ബന്ദർ അൽഖഹ്താനി അറിയിച്ചു. ഈന്തപ്പഴം മുതൽ വിപണിയിൽ ഡിമാൻഡുള്ളതും ഉയർന്ന പോഷക മൂല്യമുള്ളതുമായ ഉൽപ്പന്നങ്ങൾ അവതരിപ്പിക്കാനാണ് കമ്പനി പ്രവർത്തിക്കുന്നതെന്നും അദ്ദേഹം സൂചിപ്പിച്ചു.