Temple Attacked By Khalistanis: കാനഡയിലെ ക്ഷേത്രത്തിൽ ഭക്തർക്ക് നേരെ ഖലിസ്ഥാനികളുടെ ആക്രമണം

ഒട്ടാവ: ബ്രാംപ്ടണിലെ ഒരു ക്ഷേത്രത്തിൽ ഹിന്ദു ഭക്തർക്ക് നേരെ ഖലിസ്ഥാൻ വാദികളുടെ ആക്രമണം. സംഭവത്തെ കാനഡ പ്രധാനമന്ത്രി ജസ്റ്റിൻ ട്രൂഡോ അപലപിച്ചു. രാജ്യത്ത് അക്രമ പ്രവർത്തനങ്ങൾ അംഗീകരിക്കാനാവില്ലെന്ന് ട്രൂഡോ വ്യക്തമാക്കി. 

ഞായറാഴ്ച, ഹിന്ദു സഭാ മന്ദിറിലെ ഒരു കൂട്ടം ഭക്തരെ ഖലിസ്ഥാനി അനുയായികൾ ആക്രമിക്കുന്നത് പ്രകോപനം സൃഷ്ടിച്ചുവെന്നും. ഇന്ന് ബ്രാംപ്ടണിലെ ഹിന്ദു സഭാ മന്ദിറിൽ നടന്ന അക്രമങ്ങൾ അംഗീകരിക്കാനാവില്ല. ഓരോ കാനഡക്കാരനും അവരുടെ വിശ്വാസം സ്വതന്ത്രമായും സുരക്ഷിതമായും ആചരിക്കാൻ അവകാശമുണ്ടെന്നും ട്രൂഡോ പറഞ്ഞു. 

സമൂഹത്തെ സംരക്ഷിക്കുന്നതിനും ഈ സംഭവത്തിൽ അന്വേഷണം ആരംഭിച്ചതിനും അദ്ദേഹം പോലീസിന് നന്ദി പറഞ്ഞു. ബ്രാപ്ടണിലെ ക്ഷേത്രത്തില്‍ അതിക്രമിച്ച് കയറിയായിരുന്നു ഖലിസ്ഥാന്‍ വാദികൾ ആക്രമണം അഴിച്ചുവിട്ടത്. സംഭവത്തിന്‌റെ ദൃശ്യങ്ങൾ സമൂഹമാധ്യമങ്ങളില്‍ വ്യാപകമായി പ്രചരിക്കുകയാണ്. വടികളും മറ്റുമായി എത്തിയ സംഘം ക്ഷേത്രത്തിലുണ്ടായിരുന്നവരെ ആക്രമിക്കുന്നത് ദൃശ്യങ്ങളിലൂടെ വ്യക്തമാണ്. 

ഇവരുടെ കയ്യിൽ ഖലിസ്ഥാന്‍ പതാകയും ഉണ്ടായിരുന്നു. ആക്രമണത്തില്‍ കുട്ടികള്‍ക്കും സ്ത്രീകള്‍ക്കും ഉള്‍പ്പെടെ പരിക്കേറ്റിട്ടുണ്ടെന്ന് ഹിന്ദു കനേഡിയന്‍ ഫൗണ്ടേഷന്‍ അറിയിച്ചു. ഇന്ത്യ-കാനഡ ബന്ധം വഷളായത് ഖലിസ്ഥാന്‍ നേതാവ് ഹര്‍ദീപ് സിംഗ് നിജ്ജാറിന്‌റെ കൊലപാതകത്തിന് പിന്നാലെയാണ്. നിജ്ജാറിന്‌റെ കൊലപാതകത്തില്‍ കേന്ദ്ര ആഭ്യന്തര മന്ത്രി അമിത് ഷായ്ക്ക് പങ്കുണ്ടെന്ന് കനേഡിയന്‍ പ്രധാനമന്ത്രി ആരോപിച്ചിരുന്നു. സംഭവത്തിന് പിന്നാലെ രൂക്ഷ വിമര്‍ശനമാണ് ഇന്ത്യ കാനഡയ്‌ക്കെതിരെ ഉന്നയിച്ചത്.

കഴിഞ്ഞ വര്‍ഷം ജൂണിലായിരുന്നു ഇന്ത്യ ഭീകരനായി പ്രഖ്യാപിച്ച ഹര്‍ദീപ് സിംഗ് നിജ്ജാര്‍ വെടിയേറ്റ് മരിച്ചത്. കൊലപാതകത്തില്‍ ഇന്ത്യക്ക് പങ്കുണ്ടെന്ന് നേരത്തെ കാനഡ ആരോപിച്ചിരുന്നുവെങ്കിലും  ആരോപണങ്ങളെ തള്ളിയ ഇന്ത്യ കാനഡയുടെ വാദം അസംബന്ധമാണെന്ന് പ്രതികരിക്കുകയും ചെയ്തു.