South Korea: പ്രഖ്യാപിച്ച് 6 മണിക്കൂർ; ദക്ഷിണ കൊറിയയിലെ പട്ടാള നിയമം പിൻവലിച്ച് പ്രസിഡന്റ്

സോൾ: ദക്ഷിണ കൊറിയയിൽ പ്രഖ്യാപിച്ച പട്ടാളനിയമം പിൻവലിച്ച് പ്രസിഡന്റ് യൂൻ സുക് യോൽ. പ്രഖ്യാപിച്ച് 6 മണിക്കൂറിനകം പട്ടാളനിയമം പിൻവലിക്കുകയായിരുന്നു. വ്യാപക പ്രതിഷേധത്തിന് പിന്നാലെയാണ് പട്ടാളനിയമം പിൻവലിച്ചത്. പ്രഖ്യാപനത്തിന് പിന്നാലെ രാത്രി സൈന്യം പാർലമെന്റ് വള​ഞ്ഞിരുന്നു. പിന്നാലെ പ്രതിപക്ഷം പ്രസിഡന്റിന്റെ രാജി ആവശ്യപ്പെട്ട് സംഘർഷമുണ്ടാക്കി. തുടർന്ന് സൈനിക ഭരണം നിരസിച്ച് പാർലമെന്റ് അംഗങ്ങൾ വോട്ട് ചെയ്യുകയും വിന്യസിച്ച സൈനികരെ സർക്കാർ പിൻവലിക്കുകയും ചെയ്തു. ശേഷം സൈനിക നിയമം പിൻവലിച്ച് ഔദ്യോഗിക പ്രഖ്യാപനം നടത്തുകയായിരുന്നു.

ദക്ഷിണ - ഉത്തര കൊറിയയ്ക്കിടയിൽ സംഘര്‍ഷം രൂക്ഷമായതിന് പിന്നാലെയാണ് ചൊവ്വാഴ്ച രാത്രി ദക്ഷിണ കൊറിയയില്‍ സൈനിക അടിയന്തരാവസ്ഥ പ്രഖ്യാപിച്ചത്. ഉത്തര കൊറിയയോട് പ്രതിപക്ഷം ആഭിമുഖ്യം പുലർത്തുന്നതായും സമാന്തര സർക്കാർ ഉണ്ടാക്കി ഭരണം അട്ടിമറിക്കാൻ ശ്രമിക്കുന്നുവെന്നും ഇതിനായി രാജ്യവിരുദ്ധ പ്രവർത്തനങ്ങൾ സംഘടിപ്പിക്കുന്നതായും ആരോപിച്ചാണ് പ്രസിഡന്റ് യൂൻ പട്ടാള നിയമം പ്രഖ്യാപിച്ചത്.