`या` बॉलिवूड सौंदर्यवतीसोबत स्क्रीन शेअर करण्याची विल स्मिथची इच्छा

जवळपास १५ वर्षांपूर्वी तो तिला भेटला होता.

मुंबई: हॉलिवूड कलाकारांची भारतातील वाढती लोकप्रियता पाहता गेल्या काही वर्षांपासून बऱ्याच प्रसिद्ध चेहऱ्यांनी विविध कार्यक्रमांच्या निमित्ताने भारतात हजेरी लावल्याचं पाहायला मिळालं आहे. यातच आता आणखी एका हॉलिवूड अभिनेत्याचं नाव जोडलं गेलं आहे. त्या अभिनेत्याचं नाव आहे, विल स्मिथ. 

चित्रपटांच्याच दृष्टीने महत्त्वाच्या असणाऱ्या अशा एका कार्यक्रमात उपस्थिती लावली असता त्याने यावेळी पाश्मिात्य चित्रपटांविषयीही काही महत्त्वाचे मुद्दे मांडल्याचं पाहायला मिळालं. 

विल स्मिथ हा भारतात प्रचंड लोकप्रिय असला तरीही त्याच्या मनावर मात्र एका भारतीय अभिनेत्रीने भुरळ पाडल्याचं स्पष्ट होत आहे. ती अभिनेत्री म्हणजे विश्वसुंदरी ऐश्वर्या राय बच्चन.

अनेकांच्याच काळजाचा ठोका चुकवणाऱ्या ऐश्वर्यासोबत एकदा स्क्रीन शेअर करण्याची इच्छा असल्याचं विलने या कार्यक्रमात स्पष्ट केलं. 

जवळपास १५ वर्षांपूर्वी ऐश्वर्यासोबत आपली भेट झाली असून, त्यावेळीच चित्रपटात काम करण्यासंबंधी आमची चर्चा झाली होती. पण, त्यानंतर मात्र ही बाब काही पुढे जाऊ शकली नाही. त्यामुळे आता येत्या काळात तिच्यासोबत काम करण्याची संधी मिळेल अशी आशाही त्याने व्यक्त केली. 

विलने व्यक्त केलेली ही इच्छा पाहता आता येत्या काळात ऐश्वर्या आणि तो कोणत्या प्रोजेक्टसाठी एकत्र येतात का, हे पाहणं औत्सुक्याचं ठरणार आहे. 

दरम्यान, विल स्मिथ भारतात आला, त्यावेळी त्याची भेट घेण्यासाठी बऱ्याच बी- टाऊन सेलिब्रिटींची उपस्थिती पाहायला मिळाली. सोशल मीडियावरही या खास क्षणांचे बरेच फोटोही पाहायला मिळाले.