‘या’ तारखेपूर्वी जलोटा यांची एक्झिट निश्चित

मुंबई: ‘बिग बॉस’ या रिअलिटी शोच्या प्रत्येक पर्वाची कलाविश्वात बरीच चर्चा पाहायला मिळते. या वादग्रस्त कार्यक्रमाचं सध्याचं पर्वही बऱ्याच कारणांमुळे गाजत आहे. त्यातीलच एक कारण म्हणजे भजन सम्राट अनुप जलोटा आणि त्यांची प्रेयसी जसलीन मथारु यांच्यातील केमिस्ट्री.

आपल्याहून वयाने ३७ वर्षे लहान असणाऱ्या तरुणीला डेट करणाऱ्या जलोटा आणि जसलीन यांच्या केमिस्ट्रीविषयी काही वेगळं सांगण्याची गरजच नाही.

कारण, सोशल मीडियावर या कार्यक्रमाच्या अकाऊंटवरुनही बिग बॉसच्या घरातील काही व्हिडिओ पोस्ट करण्यात येत आहेत. ज्यामध्ये जसलीन आणि जलोटा यांच्या नात्याची सुरेख बाजूही पाहायला मिळत आहे.

मुख्य म्हणजे या दोघांनाही जेतेपदाचं प्रबळ दावेदार समजलं जात असतानाच आता जलोटा लवकरच या घरातून बाहेर येणार असल्याच्या चर्चांनी जोर धरला आहे.

२७ ऑक्टोबरपूर्वीच जलोटा या घरातून एक्झिट घेणार असल्याचा अंदाज वर्तवण्यात येत आहे.

२७ ऑक्टोबरला कॅलिफोर्निया येथे त्यांच्या लाईव्ह कॉन्सर्टचं आयोजन करण्यात आलं आहे. किंबहुना या कॉन्सर्टच्या तिकीट विक्रीलाही सुरुवात झाली आहे.

‘तिकीट हंगामा’ या संकेतस्थळावर ही तिकीटं विकली जात असून, आता एकंदर परिस्थिती पाहता जलोटा यांची एक्झिट नक्की, असंच म्हटलं जात आहे.

मुख्य म्हणजे लोकप्रियतेसाठीची ही कोणती शक्कल आहे की खरंच जलोटा यांच्या लाईव्ह कॉन्सर्टच्या तयारीला सुरुवात झाली आहे, याविषयीची अधिकृत माहिती समोर आलेली नाही. त्यामुळे आता येत्या काही दिवसांमध्येच याविषयीचं चित्र स्पष्ट होणार आहे.