२१ मार्चला वाढदिवशी राणी मुखर्जी चाहत्यांना देणार हे गिफ्ट?

मुंबई : मर्दानी आणि मर्दानी २च्या दमदार यशानंतर आता मर्दानी ३ ही लवकरच पडद्यावर येणार आहे. अशी माहिती मिळतेय की अभिनेत्री राणी मुखर्जीच्या वाढदिवशी म्हणजेच २१ मार्चला मर्दानी ३ सिनेमाबाबत घोषणा होऊ शकते. त्यामुळे राणी मुखर्जीच्या चाहत्यांना तिच्या वाढदिवसानिमित्त हे एकप्रकारे गिफ्ट मिळणार आहे.

पहिल्या दोन चित्रपटांप्रमाणेच मर्दानी ३ सिनेमाही एका गंभीर विषयावर असू शकतो. या चित्रपटाची कथा काय असावी, यावर अनेक विचारविनिमय झाल्याचंही कळतंय. महिलांची सुरक्षा हा मर्दानी सिनेमा सिरीजचा गाभा असतो.

मर्दानी सिनेमात राणी ही एक निर्भिड पोलिस दाखवली आहे, जी मानवी तस्करी करणाऱ्या एका रॅकेटचा पर्दाफाश करते. तर दुसऱ्या मर्दानी सिनेमाची कथा एका बलात्कारी नराधमाला पकडण्यावर आधारित आहे. त्यामुळे आता मर्दानी ३ सिनमा कोणती कथा घेऊन प्रेक्षकांसमोर येतो, याची उत्सुकता आहे.

मर्दानी २ येऊनही आता २ वर्षे झाली आहेत. जेव्हा मर्दानी २ बॉक्स ऑफीसवर गाजत होता, तेव्हाच दिग्दर्शक गोपी पुथरन यांनी म्हटलेलं, की आम्ही तिसऱ्या भागासोबत परत येऊ. आता राणी मुखर्जीच्या वाढदिवसाला म्हणजेच २१ मार्चला तरी मर्दानी ३ ची घोषणा होते का, पाहावं लागेल.