Maharashtra Politics : राज्याचे विरोधी पक्षनेते अजित पवार (Ajit Pawar) हे त्यांच्या स्पष्टवक्तेपणासाठी कायमच ओळखले जातात. कधीकाळी त्यांच्या वक्तव्यामुळे अजित पवार अडचणीत देखील आले होते. याबाबत बोलताना त्यांनी पुन्हा असे वक्तव्य करताना काळजी घेत असल्याचे अनेकदा उघडपणे सांगितले आहे. दुसरीकडे आपल्या भाषणांमधून विरोधकांवर टीका करताना अजित पवार हे नेहमीच आपल्या खास शैलीत काही खास किस्से सांगत असतात. अशाच एका कार्यक्रमात बोलताना अजित पवार यांनी एक किस्सा सांगितला आणि उपस्थितांना हसू अनावर झालं.


COMMERCIAL BREAK
SCROLL TO CONTINUE READING

बारामतीत सुरु असलेल्या मोफत मोतीबिंदू उपचार शिबिराच्या कार्यक्रमात अजित पवार (Ajit Pawar )बोलत होते. यावेळी सुप्रसिद्ध नेत्रतज्ञ डॉक्टर तात्याराव लहाने, डॉ. रागिनी पारेख, अजित पवार यांच्या पत्नी सुनेत्रा पवार उपस्थित होत्या. यावेळी भाषण करताना अजित पवार यांनी त्यांच्यासोबत घडलेला किस्सा सांगितला. अजित पवार यांच्यावर डॉ. तात्याराव लहाने (Dr Tatyarao Lahane) यांनी शस्त्रक्रिया केली होती. 


"एकदा परदेशात गेल्यावर मला जाणवलं की माझ्या डोळ्याला काही झालं आहे. त्यानंतर पुन्हा मंत्रालयात असताना मला डोळ्याला त्रास होत असल्याचे जाणवलं. मी तिथून उठलो आणि गाडीत बसलो आणि डॉक्टर लहाने यांच्याकडे गेलो. डॉक्टरांनी बॅटरी डोळ्यात टाकली आणि त्यांनी काहीतरी तपासलं. ते म्हणाले तुमचा रॅटिनाचा प्रॉब्लेम आहे. त्याला लेझरने बांध घालावा लागेल. उसाला बांध घालतो तसा डोळ्यात बांध घालावा लागेल असे ते म्हणाले. डॉक्टर सांगतात ते ऐकावे लागतं. ते म्हणाले कधी ऑपरेशन करायचे मी आत्ताच्या आता करा सांगितले. घरी ऑपरेशन झाल्यावर सांगेन. तिथेच डॉक्टरांनी मला आडवा केला आणि डोळ्यात बांध घातला," असे अजित पवार म्हणाले.


"मी त्यांना हे मलाच का झाले असं विचारलं तर अजित पवार हे दहा लाखांमध्ये एका होतं असं त्यांनी सांगितले. बरा दहा लाखांत मीच सापडलो. त्यानंतर चष्मा वापरायला लागतो. त्यामुळे आपण आपल्या आरोग्याची काळजी घेतली पाहिजे," असेही अजित पवार म्हणाले.