धक्कादायक! अहमदनगरमध्ये माजी नगरसेविकेवर भरदिवसा गोळीबार

माजी नगरसेविकेवर भरदिवसा गोळीबार झाल्याने परिसरात प्रचंड भीतीचं वातावरण निर्माण झालं आहे

अहमदनगर : अहमदनगरमधल्या राहुलीत भरदिवसा माजी नगरसेविका सोनाली गुलाब बर्डे यांच्यावर गोळीबार झाल्याची घटना समोर आली आहे. 

राहुरी शहरात ग्रामीण रुग्णालय परिसरात भिलहाटी इथं गावठी कट्ट्यातुन गोळीबार करण्यात आला. या घटनेत सोनाली बर्डे थोडक्यात बचावल्या, त्यांच्या हाताला गोळी लागल्याने त्यांना रुग्णालयात उपचारासाठी दाखल करण्यात आलं आहे. राहुरी पोलिसांनी या घटनेतील काही आरोपींना तात्काळ ताब्यात घेतलं आहे.

नेमकी घटना काय? 
नगर जिल्ह्यातील राहुरी शहर हद्दीतील ग्रामीण रुग्णालय परिसरात अससेल्या भिलहाटी इथं गेल्या काही दिवसांपासून पवार आणि माळी या दोन गटांत काही कारणांवरून वाद सुरू होते. काही वेळा तुरळक हाणामारी झाल्याच्या घटना घडल्या होत्या. पण आज दुपारी या वादाला उग्र  स्वरूप प्राप्त झालं. 

पवार आणि माळी या दोन गटांत वाद उफाळून आला. या वादातून राहुरी नगरपरिषद च्या माजी नगरसेवीका सोनाली बर्डे यांच्यावर गावठी कट्ट्यातुन गोळीबार झाला. नशीब बलवत्तर म्हणून या घटनेत त्या थोडक्यात बचावल्या आहेत. गोळी त्यांच्या हाताला लागली.

घटनेची माहिती मिळताच पोलिस निरीक्षक प्रताप दराडे पोलिसांचा मोठा फौजफाटा घेऊन घटनास्थळी दाखल झाले. दोन ते तीन जणांना पोलिसांनी ताब्यात घेतलं असून त्यांची चौकशी सुरु आहे.