मनसे नेते गजानन काळे यांच्या अडचणीत वाढ, गृहमंत्र्यांनी दिले अटकेचे आदेश

शिवसेना, काँग्रेस आणि राष्ट्रवादी पक्षाच्या महिला कार्यकर्त्या गजानन काळे यांना अटक करण्यासाठी आक्रमक

नवी मुंबई : नवी मुंबई मनसे (MNS) शहराध्यक्ष गजानन काळे यांच्यावर पत्नी संजीवनी काळे यांनी शारिरीक, मानसिक छळवणूक करणे, जातीवाचक शिवीगाळ करणे आदी कलमांखाली गंभीर गुन्हे दाखल केले आहेत. गुन्हा दाखल होवून सहा दिवस उलटून गेले तरी नवी मुंबई पोलिसांनी अद्याप काळे यांना अटक केली नसल्याने महाविकास आघाडीमधील शिवसेना,(ShivSena) काँग्रेस (Congress) आणि राष्ट्रवादी (NCP) पक्षाच्या महिला कार्यकर्त्या आक्रमक झाल्या आहेत. 

गृहमंत्री दिलीप वळसे-पाटील (Maharashtra Home Minister Dilip Walse Patil) आज पोलीस आयुक्तांलयाचा आढावा घेण्यासाठी आले असता त्यांची भेट घेण्याचा प्रयत्न महिलांनी केला. यावेळी त्यांना अडवण्यासाठी पोलीस बंदोबस्त तैनात करण्यात आल्याने पोलीस आणि महिला कार्यकर्त्यांमध्ये धक्काबुक्की झाली. अखेर गृहमंत्र्यांनी महिलांच्या शिष्टमंडळाला भेटून परिस्थिती समजून घेतली. 

गजानन काळे यांच्या पत्नी संजीवनी काळे यांनी दिलीप वळसे-पाटील यांच्यासमोर आपल्यावर होत असलेल्या अन्यायाचा पाढा वाचला. यावेळी गृहमंत्र्यांनी काळेला अटक करू असं आश्वासन महिला शिष्टमंडळाला दिली. यानंतर पोलीस आयुक्त बिपीन कुमार यांनीही गजानन काळेला पकडण्यासाठी विशेष टीम तयार करण्यात आल्या असून लवकरच अटक होईल असं स्पष्ट केलं.