पुण्यातील फ्लॅटमध्ये हात-पाय बांधलेल्या अवस्थेत सापडले पती-पत्नीचे मृतदेह, गूढ कायम

Pune Crime News: लोहगाव परिसरातील एका बंद घरात पती-पत्नीचे मृतदेह सापडले आहेत. या घटनेमुळं परिसरात एकच खळबळ उडाली आहे. याप्रकरणी पोलिस अधिक तपास करत आहेत.

Pune News Today: लोहगाव परिसरातील एका बंद घरात पती-पत्नीचे मृतदेह आढळून आले आहेत. पतीचा गळफास घेतलेल्या अवस्थेत तर पत्नीचा बेडवर झोपलेल्या अवस्थेत मृतदेह आढळला आहे. पत्नीचा हात-पाय बांधलेल्या अवस्थेत मृतदेह सापडल्याने एकच खळबळ उडाली आहे. दरम्यान हा प्रकार खुनाचा आहे की आत्महत्येचा, हे मात्र अद्याप स्पष्ट झाले नाहीये. 

किरण महादेव बोबडे (वय 23), आरती किरण बोबडे (वय 20 दोघे राहणार रा. वडगाव शिंदे रोड,लोहगाव) अशी दोघांचे नावे आहेत. ही घटना सोमवारी (दि.6) सकाळी अकरा वाजताच्या सुमारास येथील लोहगाव वडगावशिंदे रोड लेक व्ह्यू सिटी या सोसायटीत उघडकीस आली आहे. याप्रकरणी विमानतळ पोलिस ठाण्यात अकस्मात मृत्यूची नोंद करण्यात आली आहे.

पोलिसांनी दिलेल्या माहितीनुसार, सोमवारी सकाळी अकरा वाजण्याच्या सुमारास घरातून दुर्गंधी येत असल्याचे घरमालक प्रशांत यादव यांच्या निदर्शनास आले. घरमालक वरच्या मजल्यावर राहत होते तर तर बोबडे दाम्पत्य खालच्या मजल्यावर राहत होते. त्यांनी याबाबत पोलिस नियंत्रण कक्षाला माहिती दिली. पोलिसांनी घटनास्थळी धाव घेतली असता खोलीचा दरवाजा बंद होता. अनेकदा प्रयत्न करुनही दरवाजा उघडला नाही. त्यामुळं पोलिसांनी दरवाजा तोडून आत प्रवेश केला.

पोलिसांना किरणचा मृतदेह छताच्या हुकला गळफास घेतलेल्या अवस्थेत सापडला तर पत्नी आरती ही बेडवर मृत अवस्थेत सापडली. तिचा मृतदेह कुजण्यास सुरूवात झाली होती. शनिवारी सकाळपासून त्यांच्या खोलीचा दरवाजा बंद होता. अंदाजे दोन दिवसांपूर्वी ही घटना घडल्याचा अंदाज वर्तवला जातो आहे

पोलिस उपायुक्त शशिकांत बोराटे, सहाय्यक पोलीस आयुक्त संजय पाटील, वरिष्ठ पोलिस निरीक्षक आनंदराव खोबरे यांनी घटनास्थळी भेट देऊन तपासाच्या सुचना दिल्या आहेत. त्यानंतर पंचनामा झाल्यानंतर दोघांचे मृतदेह शवविच्छेदनासाठी ससून रुग्णालयात पाठविण्यात आले होते. किरण हा पोस्टात कंत्राटी नोकरी करत होता. तो मुळचा माजलगाव बीड येथील राहणार आहे. तर पत्नी आरती ही येरवड्यातील असून एका खासगी बँकेत नोकरी करत असल्याची प्राथमिक माहिती आहे. 

काही महिन्यांपूर्वीच किरण आणि आरती यांचा विवाह झाला होता. पाच महिन्यांपासून ते या ठिकाणी भाड्याने राहण्यासाठी आले होते. मात्र, अशा पद्धतीने त्यांचा मृतदेह सापडल्याने एकच खळबळ उडाली आहे. याबाबत पोलिस ठाण्यात अकस्मात मृत्यूची नोंद करण्यात आली असून शवविच्छेदन अहवाल प्राप्त झाल्यानंतरच नेमके काय घडले हे समोर येईल. पुढील तपास पोलिस करीत आहेत.