सुशांत आणि आर्यन प्रकरणामुळे प्रसिद्धीत आलेले समीर वानखेडे राजकारणात उतरणार, येथून निवडणूक लढवणार

Sameer Wankhede News : NCBचे माजी मुंबई झोनल डायरेक्टर समीर वानखेडे महाराष्ट्राच्या राजकारणात उतरण्याची शक्यत आहे. ते विधानसभा निवडणुकीपासून आपली राजकीय इनिंग सुरु करु शकतात, अशी माहिती समोर आली आहे. ते वाशिममधून निवडणूक लढवू शकतात. मात्र, ते कोणत्या पक्षातून निवडणूक लढवणार याचा सस्पेन्स कायम आहे.

Sameer Wankhede News : नार्कोटिक्स कंट्रोल ब्युरोचे (NCB)  माजी मुंबई झोनल डायरेक्टर आणि आर्यन खान ड्रग्ज प्रकरणी वादात सापडलेले समीर वानखेडे लवकरच राजकारणात पदार्पण करु शकतात अशी शक्यता आहे. याबाबत मिळालेल्या माहितीनुसार, समीर वानखेडे महाराष्ट्र विधानसभा निवडणुकीपासून आपली राजकीय सुरुवात करु शकतात. ते वाशिममधून निवडणूक लढवू शकतात. मात्र, ते कोणत्या पक्षातून निवडणूक लढवणार हे स्पष्ट झालेले नाही.

NCB ने समीर वानखेडे यांच्या नेतृत्वाखाली 2 ऑक्टोबर 2021 रोजी मुंबई बंदरातून एका क्रूझ जहाजावर हाय-प्रोफाइल छापा टाकला होता. यात बॉलिवूड स्टार शाहरुख खान याचा मुलगा आर्यन खानसह 20 लोकांना अटक केली. सुमारे तीन आठवडे तुरुंगात राहिल्यानंतर आर्यन याची जामिनावर सुटका झाली. गेल्या वर्षी मे महिन्यात एनसीबीने आर्यन खानसह सहा जणांवरील ड्रग्ज बाळगण्याचे आरोप काढून टाकले होते.

मोठ्या वादानंतर दिल्लीतील एनसीबीच्या पथकाने तपास हाती घेतला आणि वानखेडे यांची बदली करण्यात आली. या प्रकरणाशी संबंधित एक अहवाल देखील आला होता, ज्यामध्ये या संपूर्ण प्रकरणात आर्यन खान याला जाणूनबुजून कसे  टार्गेट करण्यात आले होते, क्रूझर ड्रग्ज प्रकरणाचा संपूर्ण तपास संवेदनशील प्रकरणासाठी नेमलेल्या एनसीबी अधिकाऱ्यांच्या तपासातील त्रुटी समोर आल्या. ढिसाळ पद्धतीने तपास केल्याचे बोलले जात आहे.

दरम्यान, ड्रग्ज प्रकरणी पुरेसे पुरावे नसतानाही, तपास पुढे नेण्यात आला आणि सुमारे पाच डझन लोकांचे जबाब अनेक वेळा नोंदवले गेले. एनसीबीच्या सूत्रांनी सांगितले की, या प्रकरणात सुमारे 7-8 अधिकाऱ्यांचे वर्तन संशयास्पद आढळले आणि काही इतर औषधे सापडली, ज्यासाठी विभागीय चौकशीची शिफारस करण्यात आली.

कोण आहेत समीर वानखेडे?

नार्कोटिक्स कंट्रोल ब्युरोचे (NCB)माजी मुंबई झोनल डायरेक्टर आणि आर्यन खान ड्रग्ज प्रकरणी वादात सापडले होते. तसेच त्यांच्या जात प्रमाणपत्राबाबत वाद निर्माण झाला होता. राष्ट्रवादीचे नेते नबाव मलिक यांनी त्यांच्यावर गंभीर आरोप केला होता. समीर वानखेडे हे 2008 च्या बॅचचे भारतीय महसूल सेवेचे भारतीय अधिकारी आहेत. 2021 पर्यंत त्यांनी नार्कोटिक्स कंट्रोल ब्युरोचे झोनल डायरेक्टर म्हणून काम केले. एनसीबीमध्ये दाखल होण्यापूर्वी, समीर वानखेडे यांनी राष्ट्रीय तपास संस्था आणि एअर इंटेलिजन्स युनिटमध्ये काम केले आहे.