जीएसटीमुळे हॉटेल व्यवसाय अडचणीत

मुंबई : सध्याच्या बदलत्या जीवनशैलीमुळे हॉटेलिंग ही चैन नसून गरज बनत चालली आहे. मात्र लागू झालेल्या जीएसटीमुळे ग्राहकांसह हॉटेल व्यावसायिकांनाही याची चांगलीच झळ पोहोचतेय. यामुळे हेच का अच्छे दिन असा सवाल, हॉटेल व्यावसायिक उपस्थित करु लागले आहेत. 

एसी हॉटेलमध्ये 18 टक्के, तर नॉन एसी हॉटेलमध्ये बिलाच्या 12 टक्के जीएसटी आकारण्यात येतोय. त्यामुळे हॉटेलमध्ये जेवणं परवडत नसल्याची प्रतिक्रिया नागरिकांची आहे. आधीच महागाई आणि त्यात जीएसटीचा भार यामुळे हॉटेलमध्ये येणाऱ्यांच्या खिशाला चांगलीच कात्री लागतेय.

नोटाबंदीमुळे दोन महिने हॉटेल व्यवसायाचं कंबरडं मोडलं. त्यातच एक जुलैपासून जीएसटी लागू झामुळे जवळपास 30 टक्के व्यवसाय कमी झाल्याचं हॉटेल व्यवसायिकांचं म्हणणं आहे.

एसी, नॉन एसी असा फरक न करता सरसकट 12 टक्के जीएसटी किंवा इनपुट टॅक्स क्रेडिट न देता 5 टक्के जीएसटी आकारावी अशी मागणी हॉटेल व्यावसायिकांच्या आहार संघटनेनं केली आहे.

एकीकडे फुटपाथ आणि रस्त्यावर मिळणाऱ्या खाद्यपदार्थ विक्रेत्यांना कुठलाही टॅक्स द्यावा लागत नाही. त्यामुळे तिथे जीएसटीचा प्रश्नच उद्भवत नाही. परिणामी हॉटेलमध्ये जाणारा मोठा ग्राहकवर्ग रस्त्यावरच्या खाद्यपदार्थ विक्रेत्यांकडे वळू लागला आहे.

दरम्यान जीएसटी कमी करण्याबद्दल हॉटेल व्यवसायिकांनी केंद्र आणि राज्य सरकारला गेल्या तीन महिन्यांत अनेकदा निवेदन दिली. मात्र त्याचा काहीच परिणाम झाला नसल्यानं, हॉटेल व्यावसायिक आता आंदोलनाच्या पवित्र्यात आहेत.