भाग्यवान मतदारांना मालमत्ता करात सूट; महापालिकेची योजना!

उल्हासनगर : उल्हासनगरमध्ये मतदानाचा टक्का वाढवण्यासाठी महापालिकेनं एक अनोखी शक्कल लढवलीय. 

उल्हासनगर महानगरपालिकेच्या निवडणुकीत मतदानाची टक्केवारी 35 ते 40 टक्के इतकीच असते. कायम मतदानात निष्क्रियता दाखवणाऱ्या उल्हासनगरच्या मतदारांना मतदानासाठी प्रोत्साहित करण्यासाठी महापालिका नवनवीन क्लुप्त्या आजमावयतेय. आता महापालिकेने मतदानाच्या दिवशी सेल्फी स्पर्धा आयोजित केलीय.

फोटो पाठवा व्हॉटसअपवर

या स्पर्धेत मतदानाच्या दिवशी मतदाराने मतदान केल्यानंतर बोटाला शाई लावलेला फोटो 8329271483 या व्हॉट्सअप क्रमांकावर पाठवायचाय. त्यातून प्रत्येक प्रभागातून 5 फोटो तर 20 प्रभागातून 100 फोटो निवडले जातील. या निवडक मतदारांना 2017-18 या चालू वर्षात मालमत्ता करात 25 टक्के सूट दिली जाईल अशी माहिती महापालिका आयुक्तांनी दिली.

चोख बंदोबस्त

निवडणूक काळात कायदा सुव्यवस्था राखण्यासाठी शहरात ड्रोन कॅमेऱ्याची नजर ठेवण्यात येणार आहे. उल्हासनगर महापालिका निवडणुकांच्या पार्श्वभूमीवर पोलीसांनी संचलन केलं. संपूर्ण शहरावर लक्ष ठेवण्यासाठी 6 ड्रोन कॅमेरे वापरण्यात येणार असल्याचं पोलीस उपायुक्त सुनील भारद्वाज यांनी सांगितलं.