Ladakh Road trip : बाईक, दऱ्या, बर्फ अन् निसर्ग... राहुल गांधींप्रमाणे `लडाख रोड ट्रीप`ला जाण्याचा खर्च किती?

Rahul Gandhi In Ladakh : देशाच्या अतीव उत्तरेकडे असणाऱ्या लडाखला (Ladakh Roadtrip) भेट देण्यासाठी प्रवासवेड्या प्रत्येकाचंच मन आसुसलेलं असतं. निसर्गाचा या भागावर असणारा वरदहस्त प्रत्येकालाच पाहावासा वाटतो. अशा या लडाख दौऱ्यावर जाण्याचा निर्णय राहुल गांधी यांनी घेतला. 

राहुल गांधी लडाख येथे पोहोचले आणि तिथं त्यांनी वडील राजीव गांधी यांच्या जयंतीनिमित्त लडाखमधील पँगाँग त्सोपाशी त्यांना श्रद्धांजलीही वाहिली. 

राहुल गांधी यांची लडाखसफर अतिशय खास ठरली. कारण, इथं शाळकरी मुलांपासून स्थानिकांपर्यंत प्रत्येकाशी त्यांनी संवाद साधला. येथील दैनंदिन जीवनात डोकावण्याचा प्रयत्न केला. या सफरीमध्ये काही बाईकर्स मित्रांनी त्यांना मदत केली आणि खास साथ दिली ती म्हणजे KTM Adventure या बाईकनं. 

राहुल गांधी यांनी सराईत बाईकरप्रमाणं लडाखमध्ये फेरफटका मारला. इथले लांबलचक डांबरी रस्ते म्हणू नका किंवा मग बाईकर्ससाठी आव्हानात्मक असणारे धुळीनं माखलेले रस्ते म्हणू नका. राहुल यांनी हा अनुभवही इथं घेतला. 

सोशल मीडियाच्या माध्यमातून त्यांनी आपल्या या सहलीची काही खास छायाचित्र शेअर केली. ज्यामुळं तरुणाईनं त्यांचाय या फोटोंना भरभरून प्रेम दिलं सोबतच लडाखमध्ये रोडट्रीपच्या निमित्तानं जाण्याची इच्छाही व्यक्त केली. 

तुम्हालाही लडाखच्या रोडट्रीपला जायचंय? त्यासाठी खर्चाची चिंता करताय? आता त्याचा फार विचार करु नका. कारण, लडाख सहलीसाठीच्या खर्चाचा एक अंदाज तुम्हाला इथं येणार आहे. 

लडाखमध्ये जाण्यासाठी आपण मुंबई आणि दिल्ली असे दोन पर्याय पाहणार आहोत. मुंबईहून विमानप्रवासानं थेट श्रीनगर आणि तिथून लेह मार्गे तुम्ही प्रवास करु शकता. तर, मुंबई- दिल्ली आणि श्रीनगर असा एक थांबा असणारा प्रवासही तुम्ही करु शकता. 

दिल्लीहून लडाखला जायचं झाल्यास तुम्ही विमानानं श्रीनगरला पोहोचू शकता. किंवा मग चंदीगढहून रस्तेमार्गानं लडाखला जाऊ शकता. मुंबईहून निघणार असाल तर श्रीनगरला पोहोचून तिथून बाईक भाड्यानं घेत किंवा मह स्वत:ची बाईक असल्याच थेट मुंबईहून लडाख गाठू शकता. इथं तुमच्याकडे बाईक रेल्वेनं श्रीनगरनजीकच्या रेल्वेस्थानकावर पाठवण्याचा पर्यायही असेल. 

मुंबईहून लेह साधारण 2316 किमी अंतरावर असून थांबत थांबत बाईकनं तुम्ही इथं दोन दिवसांमध्ये पोहोचू शकता. अगदी नवखे बाईकर असल्यास तिसरा दिवसही उजाडू शकतो. बाईकचा सरासरी वेग आणि 20 लीटर पेट्रोलच्या टाकीनुसार तुम्ही आजच्या दरानं साधारण 5000 ते 5500 रुपयांचा पेट्रोल खर्च करणं अपेक्षित आहे. 

प्रवासादरम्यानचे थांबे, लहानमोठे ब्रेक घेत आणि वास्तव्याची ठिकाणं पाहता हा खर्च तीन ते चार हजारांच्या घरात जाईल. बाईकला टोल नसल्यामुळं हा खर्च इथं वाचतो. लडाखमध्ये राहण्यासाठी तुम्ही हॉस्टेल, होमस्टे अशा पर्यायांना निवडू शकता. इथं खर्चाचा आकडा दर दिवशी सरासरी 1200 रुपये पकडल्यास सहा ते सात दिवसांसाठी तुम्ही 6500 रुपये मोजता. 

लडाखमध्ये फिरणं, खाणं आणि तिथले स्थानिक परवाने यांसाठीचा किरकोळ खर्च धरून जाऊन येऊन या सहलीसाठी तुम्हाला (बाईकवरून गेल्यास) माणसी जवळपास 45000 रुपये खर्च येईल (खर्च कमीजास्तही होऊ शकतो). एखाद्या Tour Company कडून गेल्यास तुम्हाला हा खर्च कमी येऊ शकतो. लडाखमध्ये काही ठिकाणांवर जाण्यासाठी परवान्याची गरज असते. तर, काही क्रमांकाची वाहनं इथं चालत नाहीत. त्यामुळं तुमच्याकडे कोणत्या आरटीओ पासिंगची बाईक आहे हेसुद्धा लक्षात घ्या. 

दिल्लीवरून लडाखला जायचं झाल्यास तुम्ही बाईकनं साधारण 950 किमीचं अंतर ओलांडता. लेहला पोहोचल्यानंतर तिथं अॅक्लेमटाईज झाल्यानंतरच म्हजेच तिथल्या वातावरणाशी तुम्ही एकरुप झाल्यानंतरच पुढील प्रवास सुरु करता. कमीत कमी एक किंवा दोन दिवसांत तुम्ही हा प्रवास करु शकता. खर्चाचं म्हणावं तर, सरासरी पेट्रोलसाठी तुम्ही 4000 ते 5000 रुपये खर्च कराल. तर, राहण्याखाण्यासाठी तुम्ही इथं होमस्टे, हॉस्टेल निवडू शकता. सरासरी इथं बंक बेडचे दर 700 रुपयांपासून आहेत. खासगी रुमसाठी तुम्हाला सोयीनुसार पैसे मोजावे लागतात. काही ठिकाणी किमान दरात चांगल्या रुम मिळून जातात. तर, काही ठिकाणी तुम्हाला अडीच हजार रुपयेही भरावे लागू शकतात. 

लडाखमध्ये खाण्यावर तुमचे जास्त पैसे खर्च होऊ शकतात. कारण, इथं येणाऱ्या पदार्थांची ने - आण करण्यासाठीचा खर्चही यामध्ये जोडला जातो. मुद्द्याची गोष्ट, दिल्ली ते लडाख To and From प्रवासासाठी तुम्हाला मोजावे लागतील 30000 रुपये (इथंही खर्च कमी-जास्त होऊ शकतो). इथं येण्याआधी येथील हवामानाचा आढावा घ्या आणि त्यानुसार पूर्वतयारीनिशी सहलीवर या. लडाख रोडट्रीपसाठी येण्याआधी शारीरिक सुदृढतेवरही काहीसं काम केलं जाणं महत्त्वाचं. त्यामुळं ही सर्व तयारी करा आणि मनसोक्त लडाख फिरा!!!