आयसीसी रँकींगमध्ये विराट अव्वल स्थानी कायम

विराटचं वर्चस्व कायम

मुंबई : भारताचा कर्णधार विराट कोहली आयसीसी टेस्ट रँकिंगच्या फलंदाजांच्या क्रमवारीत अव्वल स्थानी कायम आहे. विराट कोहलीने चौथ्या कसोटीत ४६ आणि ५८ धावांची खेळी केली. इंग्लंड विरुद्धच्या आठ इनिंगमध्ये कोहलीने ५४४ धावा केल्या आहेत. त्याच्या खात्यात आता ९३७ गुण जमा झाले आहेत.

इंग्लंडविरुद्धच्या चौथ्या टेस्ट सामन्यात भारताचा ६० रनने पराभव झाला. २४५ रनचा पाठलाग करताना भारताला सुरुवातीला ३ धक्के लागले. पण कर्णधार विराट कोहली आणि उपकर्णधार अजिंक्य रहाणे यांनी अर्धशतक करून भारताला मॅचमध्ये परत आणण्याचा प्रयत्न केला पण तो अपयशी ठरला.

कर्णधार असताना विराटनं टेस्टमध्ये ४ हजार रन पूर्ण केले आहेत. विराटआधी कोणत्याही भारतीय कर्णधाराला हे रेकॉर्ड मोडता आला नाही. विराट टेस्टमध्ये सर्वात जलद ४ हजार रन करणारा खेळाडू बनला आहे. विराटनं ६५ इनिंगमध्ये ४ हजार रन पूर्ण केल्या. याआधी ब्रायन लाराच्या नावावर हा रेकॉर्ड होता. लारानं ७१ इनिंगमध्ये ४ हजार रन केले होते. इंग्लंडमध्ये ५०० रन पूर्ण करणारा विराट पहिला आशियाई कर्णधार आहे. इंग्लंडमध्ये ५०० रन करणारा विराट तिसरा भारतीय खेळाडू आहे.

टेस्टच्या चौथ्या इनिंगमध्ये विराटनं आत्तापर्यंत ६ अर्धशतकं केली आहेत. राहुल द्रविडनं चौथ्या इनिंगमध्ये ७ वेळा आणि सुनील गावसकर यांनी ९ वेळा अर्धशतकं केली आहेत.