ஜல்லிக்கட்டு: கொட்டும் மழையிலும் தொடரும் போராட்டம்!

தமிழகத்தில் மழை பெய்து வரும் நிலையிலும் கூட மாணவர்கள் தொடர்ந்து ஜல்லிக்கட்டுக்கு ஆதரவான தங்களின் போராட்டத்தை நடத்தி வருகின்றனர்.

புதுச்சேரி மட்டுமின்றி மதுரை, கோவை, விழுப்புரம், பெரம்பலூர், அரியலூர், நாகை, புதுக்கோட்டை உள்ளிட்ட பல மாவட்டங்களில் இரவிலும், இன்று அதிகாலையிலும் மழை கொட்டி வருகிறது. ஆனால், மாணவர்கள் உற்சாகம் கொஞ்சமும் குறையாமல் போராட்டத்தை தொடர்ந்து நடத்தி வருகின்றனர். சென்னை மெரினாவில் மாணவர்களுக்கு ஆதரவாக போராட்ட களத்தில் பங்கேற்போரின் எண்ணிக்கை தொடர்ந்து அதிகரித்து வருகிறது. 

அதிகாலையில் மழை கொட்டிய நிலையில் போராட்டத்தில் ஈடுபட்டு வரும் மாணவர்கள் ஒன்றிணைந்து சாலையில் ஆடிப்பாடி உற்சாகமாக போராட்டத்தை தொடர்ந்தனர். இதே போன்று பல பகுதிகளிலும் போராட்ட களத்தில் இருப்பவர்களை உற்சாகப்படுத்துவதற்காக தமிழர்களின் பாரம்பரிய இசைக்கருவிகளாக பறை உள்ளிட்டவைகளை முழங்கச் செய்து மாணவர்கள் போராட்டம் நடத்தி வருகின்றனர். மழையினால் ஏற்படும் குப்பைகளை அங்குள்ளவர்களே அகற்றி தங்களின் இடத்தை சுத்தமாக வைத்துள்ளனர்.