IPLનો એકમાત્ર એવો ખેલાડી જેના નામે છે 100+ વિકેટ, 1000+ રન, 100 કેચ, શું તમે જાણો છો તેનું નામ, ધોની સાથે ખાસ સંબંધ?

ચેન્નઈઃ Ravindra Jadeja : રવિન્દ્ર જાડેજાએ 8 એપ્રિલે ઈન્ડિયન પ્રીમિયર લીગમાં એક મહત્વની સિદ્ધિ હાંસલ કરી છે. આઈપીએલના 17 વર્ષના ઈતિહાસમાં કોઈ અન્ય ખેલાડી હાંસલ કરી શક્યો નથી. ઓલરાઉન્ડર રવિન્દ્ર જાડેજા IPL ઈતિહાસમાં 1000 થી વધુ રન બનાવનાર પ્રથમ ક્રિકેટર બની ગયો છે, જેને 100થી વધુ વિકેટ ઝડપી છે અને 100 કેચ પણ લીધા છે. જાડેજાએ સોમવારે કોલકાતા નાઈટ રાઈડર્સ સામે તેનો 100મો કેચ પકડ્યો હતો.

જાડેજા બન્યો હતો મેન ઓફ ધ મેચ
IPL 2024 ની 22મી મેચ સોમવારે એમએસ ચિદમ્બરમ સ્ટેડિયમ ખાતે ચેન્નાઈ સુપર કિંગ્સ અને કોલકાતા નાઈટ રાઈડર્સ વચ્ચે રમાઈ હતી. આ મેચમાં KKRની ટીમ 20 ઓવરમાં 9 વિકેટે 137 રન જ બનાવી શકી હતી. જવાબમાં CSKએ 17.4 ઓવરમાં 3 વિકેટે 141 રન બનાવીને મેચ જીતી લીધી હતી. રવિન્દ્ર જાડેજાને તેની ઓલરાઉન્ડ ગેમ માટે પ્લેયર ઓફ ધ મેચ પસંદ કરવામાં આવ્યો હતો.

17 વર્ષના ઈતિહાસમાં આ તેનો 100મો કેચ
ઓલરાઉન્ડર રવિન્દ્ર જાડેજાએ કોલકાતા નાઈટ રાઈડર્સ સામે 3 વિકેટ ઝડપી હતી. તેણે તેની પ્રથમ ઓવરના પહેલાં જ બોલ પર અંગકૃશ રઘુવંશીને આઉટ કર્યો. જાડેજાએ આ જ ઓવરમાં સુનીલ નારાયણની વિકેટ પણ લીધી હતી. જાડેજાએ તેની આગામી ઓવરમાં વેંકટેશ અય્યરને ચાલતો કરી દીધો હતો.જાડેજાએ આ જ મેચમાં KKRના કેપ્ટન શ્રેયસ અય્યરનો કેચ પણ પકડ્યો હતો. આઈપીએલના 17 વર્ષના ઈતિહાસમાં આ તેનો 100મો કેચ છે.

આ પણ વાંચોઃ ટી20 વિશ્વકપમાંથી આ 5 ખેલાડીઓનું કપાઈ શકે છે પત્તુ, IPLમાં અત્યાર સુધી રહ્યાં ફ્લોપ

જાડેજાને સર જાડેજાનું હુલામણું નામ 
રવિન્દ્ર જાડેજા આઈપીએલની પ્રથમ સિઝનથી આ ટુર્નામેન્ટમાં રમી રહ્યો છે. તેણે 2008થી અત્યાર સુધી IPLમાં 231 મેચ રમી છે. જાડેજાએ આ મેચોમાં 2776 રન બનાવવા ઉપરાંત 156 વિકેટ પણ લીધી છે. જાડેજાનું પ્રદર્શન એટલું શાનદાર હતું કે જ્યારે એમએસ ધોનીએ CSKની કેપ્ટન્સી છોડી ત્યારે આ ઓલરાઉન્ડરને ટીમની કમાન મળી ગઈ હતી. ધોનીએ પોતે જાડેજાને સર જાડેજાનું હુલામણું નામ આપ્યું છે.

35 વર્ષીય રવિન્દ્ર જાડેજા IPL ઈતિહાસમાં સૌથી વધુ કેચ લેવાના મામલે સંયુક્ત રીતે ચોથા ક્રમે છે. વિરાટ કોહલીએ સૌથી વધુ 110 કેચ લીધા છે. સુરેશ રૈના (109) બીજા અને કિરોન પોલાર્ડ (103) ત્રીજા ક્રમે છે. આ ત્રણ પછી રવિન્દ્ર જાડેજા અને રોહિત શર્મા (100) છે.