फेरीवाले पाठिंबा आंदोलनावेळी कुठे होते संजय निरुपम?

मुंबई : मुंबईत काँग्रेसनं आयोजित केलेल्या फेरीवाला सन्मान मोर्चात मुंबई काँग्रेसचे अध्यक्ष संजय निरुपम हे सहभागी झालेले दिसले नाहीत. 

निरुपम यांच्या गैरहजेरीचं कारण मात्र अस्पष्टच आहे. त्यामुळे, या आंदोलनावेळी निरुपम होते कुठे? असा प्रश्न विचारला जातोय.

अचानक बदलला गेला मोर्चाचा मार्ग

काँग्रेसने आयोजित केलेल्या फेरीवाल्यांच्या मोर्चाआधी दादरमध्ये मनसे आणि काँग्रेसचे कार्यकर्ते आमने-सामने आले. यावेळी दादरमध्ये काँग्रेसच्या मोर्चा आयोजकांची गाडीही फोडण्यात आलीय. या आंदोलनासाठी आधी स्टार मॉलपासून कबुतर खान्यापर्यंत मोर्चा काढायला पोलिसांनी परवानगी दिली होती. मात्र, अचानक मोर्चाचा मार्ग बदलण्यात आला होता. 

मनसे - काँग्रेस कार्यकर्ते भिडले

११.०० वाजल्याच्या सुमारास काँग्रेस आयोजित मूक मोर्चासाठी अनेक फेरीवाले आणि काँग्रेस कार्यकर्ते नक्षत्र मॉलच्या परिसरात जमू लागले होते. त्याचवेळी मनसेचे कार्यकर्तेही मोर्चाला विरोध करण्यासाठी तिथे आले. दोन्ही बाजूनं जोरदार घोषणाबाजी सुरू झाली आणि कार्यकर्ते एकमेकांना भिडले. 

मोर्चाच्या वेळी अनुचित प्रकार घडू नये म्हणून पोलिसांचा मोठा फौजफाटा परिसरात तैनात होताच. त्यामुळे दोन्ही बाजूनं आक्रमक असणाऱ्या कार्यकर्त्यांना रोखण्याचा पोलिसांनी प्रयत्न केला. त्यानंतर मनसेच्या काही कार्यकर्त्यांना पोलिसांनी ताब्यात घेतलं.