IPL 2024, Chennai Super Kings: 2024ஆம் ஆண்டில் நடைபெற உள்ள ஐபிஎல் தொடரில் இந்த முக்கிய வீரர் விளையாட மாட்டார் என சென்னை சூப்பர் கிங்ஸ் அணி திடீர் அறிவிப்பை வெளியிட்டுள்ளது.
17ஆவது ஐபிஎல் தொடர் அடுத்தாண்டு நடைபெற உள்ளது. அதை முன்னிட்டு மினி ஏலம் டிச.19ஆம் தேதி துபாயில் நடைபெறுகிறது.
ஐபிஎல் அணிகள் தாங்கள் ஏலத்திற்கு முன் விடுவிக்க உள்ள வீரர்களையும், தக்கவைத்துக்கொள்ள வீரர்களையும் நவ.26ஆம் தேதி காலக்கெடுவாக நிர்ணயிக்கப்பட்டுள்ளது.
அனைத்து அணிகளும் மும்முரமாக உள்ள நிலையில், சென்னை சூப்பர் கிங்ஸ் அணி ஒரு திடீர் அறிவிப்பை வெளியிட்டுள்ளது. இது ரசிகர்களுக்கு பெரும் அதிர்ச்சியை ஏற்படுத்தி உள்ளது.
வரும் 2024 ஐபிஎல் தொடரில் பென் ஸ்டோக்ஸ் விளையாட மாட்டார் என முடிவெடுத்துள்ளதாக சென்னை சூப்பர் கிங்ஸ் அணி பதிவிட்டுள்ளது. அவரின் வேலைப்பளுவை நிர்வகிக்கும் பொருட்டு இந்த முடிவை பென் ஸ்டோக்ஸ் எடுத்துள்ளதாகவும், அவரின் முடிவை சிஎஸ்கே ஏற்றுக்கொள்வதாகவும் தெரிவிக்கப்பட்டுள்ளது.
இந்த தொடரில் அவர் விளையாட மாட்டார் என்பதால் அவருக்கு பதில் வேறு ஒருவரை சிஎஸ்கே எடுக்கும். மேலும், இந்த மினி ஏலத்தின் பர்ஸிலும் சிஎஸ்கேவிற்கு ரூ.16.25 கோடி கிடைக்கும் என்பது குறிப்பிடத்தக்கது.
அவர் அடுத்தாண்டு ஐபிஎல் தொடருக்கு முன் 5 போட்டிகள் கொண்ட டெஸ்ட் தொடரிலும், அதன்பின் ஜூன் மாதம் டி20 உலகக் கோப்பை தொடரிலும் விளையாட வேண்டும் என்பதால் பென் ஸ்டோக்ஸ் இந்த முடிவை எடுத்துள்ளார்.
அதாவது, கடந்தாண்டு மினி ஏலத்தில் ரூ.16.25 கோடிக்கு சென்னை அவரை வாங்கியது. ஆனால், கடந்த தொடரிலும் அவர் காயம் காரணமாக 2 போட்டிகளில் மட்டுமே விளையாடினார்.
