ચોમાસાની થઈ ગઈ છે એન્ટ્રી, કઈ તારીખે ક્યાં પહોંચશે વરસાદ? જાણવા કરો ક્લિક

નવી દિલ્હી : દેશમાં ચોમાસું સામાન્ય રીતે 1 જૂનના દિવસે કેરળ પહોંચે છે. ભારતીય હવામાન ખાતાએ કેરલી જાહેરાત પ્રમાણે મંગળવારે કેરળ ખાતે ચોમાસાનું આગમન થઈ ગયું છે અને આ વખતે ચોમાસાની  શરૂઆત ત્રણ દિવસ પહેલાં જ થઈ છે. સામાન્ય રીતે કેરળમાં આગમન પછી આખા દેશમાં ચોમાસાને સક્રિ્ય થતા 1 મહિના જેટલો સમય લાગે છે. હવામાન ખાતાની આગાહી પ્રમાણે આ વર્ષે ચોમાસામાં દેશમાં સારો વરસાદ પડશે. 

હવામાન ખાતાએ આખા દેશમાં ચોમાસાના પ્રારંભની તારીખો જાહેર કરી છે. આ તારીખો પ્રમાણે 1 જૂન સુધી સમગ્ર કર્ણાટકમાં ચોમાસું સક્રિય થઈ જશે જ્યારે હૈદરાબાદ તેમજ પૂર્વોત્તરના સિક્કિમ સુધી ચોમાસાને પહોંચતા 5 જૂન જેટલો સમય લાગશે. મહારાષ્ટ્ર, છત્તીસગઢ, ઓડિસા, પશ્ચિમ બંગ અને બિહારમાં 10 જૂન સુધી ચોમાસું સક્રિય થાય એવી સંભાવના છે. આ સિવાય ગુજરાત, મધ્યપ્રદેશ તેમજ પૂર્વી ઉત્તર પ્રદેશમાં 15 જૂન સુધી ચોમાસાની એન્ટ્રી થશે. જોકે આ તમામ જગ્યાએ ચોમાસું એની ઝડપી ગતિના કારણે ત્રણ દિવસ પહેલાં પહોંચે એવી પૂરેપૂરી શક્યતા છે.

દેશની રાજધાની નવી દિલ્હીમાં સામાન્ય રીતે જૂનના અંત સુધી વરસાદની હાજરી નોંધાય છે અને 29 જૂન સુધી ધોધમાર વરસાદ પડે છે. અહીં સારો એવો પ્રિ-મોન્સુન વરસાદ પણ થઈ શકે છે. આ સિવાય રાજસ્થાન, હિમાચલ પ્રદેશ તેમજ જમ્મુ-કાશ્મીરમાં 29 જૂન સુધી ચોમાસું જામી શકે છે. હરિયાણા અને પંજાબમાં 1 જુલાઈ સુધી ચોમાસું પહોંચી શકે છે. આમ, હવામાન ખાતાએ દેશના તમામ વિસ્તારમાં સારો વરસાદ થશે એવો વર્તારો જાહેર કર્યો છે.