Sridevi Birth Anniversary: જાહ્નવી અને ખુશી કપૂરે પોતાના માતા શ્રીદેવીને કર્યાં યાદ, શેર કરી ભાવુક તસવીર

મુંબઈઃ બોલીવુડની હવા હવાઈ ગર્લ શ્રીદેવીની આજે જન્મજયંતિ છે. તેમનો જન્મ 13 ઓગસ્ટ, 1963ના તમિલનાડુના મીનમપટ્ટી ગામમાં થયો હતો. માત્ર ચાર વર્ષની ઉંમરે શ્રીદેવીએ ફિલ્મમાં કામ કરવાનું શરૂ કરી દીધુ હતું. 50 વર્ષ સુધી ફિલ્મ ઇન્ડસ્ટ્રીમાં રાજ કરનાર શ્રીદેવીએ અનેક શાનદાર ફિલ્મોમાં કામ કર્યું. એક જમાનામાં તે બોલીવુડના હાઈએસ્ટ પેડ અભિનેત્રી હતા. તેમની એક ફિલ્મની ફી 1 કરોડ રૂપિયા હતી. 

તે સમયમાં સામાન્ય રીતે કોઈ હીરોને જ કરોડો રૂપિયાની ફી મળતી હતી પરંતુ શ્રીદેવી અપવાદ રહ્યાં જે ઇન્ડસ્ટ્રીમાં પ્રથમ એક કરોડ રૂપિયા ફી લેનારી અભિનેત્રી બન્યા હતા. શ્રીદેવીએ પોતાના ફિલ્મ કરિયરની શરૂઆત સોલહવાં સાવનથી કરી જે 1979માં રિલીઝ થઈ હતી. ફિલ્મ ફ્લોપ રહી પરંતુ ફિલ્મ હિમ્મતવાલા દ્વારા 1983માં શ્રીદેવીએ જોરદાર કમબેક કર્યું હતું અને ત્યારબાદ અનેક દમદાર ફિલ્મો આપી હતી. 

શ્રીદેવીએ પોતાના ફિલ્મ કરિયરમાં આશરે 300 ફિલ્મો કરી હતી. તેમાં હિન્દી સિવાય તમિલ, તેલુગૂ અને મલયાલમ ફિલ્મો સામેલ છે. મીડિયો રિપોર્ટ પ્રમાણે શ્રીદેવીનું સ્ટારડમ એવું હતું કે એક સમયે તેમની સફળતાથી સુપરસ્ટાર સલમાન ખાન પણ નર્વસ થઈ ગયા હતા. શ્રીદેવીનું નિધન 24 ફેબ્રુઆરી 2018ના દુબઈમાં થયું હતું.