સલમાન અને શાહરૂખે શરમ નેવે મૂકીને માઇકમાં જોરજોરથી શરૂ કર્યું ગાવાનું અને પછી....Video

મુંબઈ : સલમાન ખાન અને શાહરૂખ ખાન બંનેની ગણતરી બોલિવૂડના સુપરસ્ટાર તરીકે થાય છે. આ બંને ભાગ્યે જ જાહેરમાં સાથે જોવા મળે છે. આ બંને કલાકારો વચ્ચે ભારે પ્રતિસ્પર્ધા છે પણ આમ છતાં તેઓ જાહેરમાં મૈત્રીપુર્ણ વર્તન દાખવે છે. હાલમાં આ બંનેનો એક વીડિયો વાઇરલ બન્યો છે જેમાં તેઓ એકબીજા સાથે ખુશ દેખાય છે. આ વીડિયોમાં શાહરૂખ અને સલમાન માઇકમાં જોરજોરથી 'પ્યાર હમે કિસ મોડ પે લે આયા' ગીત ગાય છે. આ ગીત ફિલ્મ 'સત્તે પે સત્તા'નું છે. 

હાલમાં સલમાને પોતાનો 53મો જન્મદિવસ ઉજવ્યો છે. આ વીડિયો સલમાનની પાર્ટીનો છે કે નહીં એ તો ખબર નથી પણ વીડિયોમાં તેમની કેમિસ્ટ્રી ગજબની છે. હાલમાં સલમાને 'ઝીરો'માં મહેમાન કલાકારનો રોલ કર્યો હતો. આ ફિલ્મમાં શાહરૂખ મેઇન હીરો છે. 

હાલમાં શાહરૂખને સવાલ કરવામાં આવ્યો હતો કે શું તે સલમાન અને આમિર સાથે કામ કરવાનું પસંદ કરશે? જોકે શાહરૂખે આ વાતનો બહુ હકારાત્મક જવાબ આપ્યો હતો. તેણે ટેલિગ્રાફ સાથેના એક ઇન્ટરવ્યૂમાં જણાવ્યું હતું કે " જો મને સલમાન તેમજ આમિર સાથે કામ કરવાની તક મળે તો હું શું કામ એને ગુમાવું ? મારા માટે આ બહુ મોટી વાત છે. મેં સલમાન સાથે કરણ અર્જુનમાં કામ કર્યું છે પણ આમિર સાથે કામ નથી કર્યું."