બોપલમાં વધુ એક હત્યા! NRI જમીન દલાલની માથું છૂંદાયેલી હાલતમાં લાશ મળી, સંતાનોએ USથી લાશ ટ્રેક કરી

ઉદય રંજન/અમદાવાદ: અમદાવાદના બોપલ પોલીસ સ્ટેશન વિસ્તારમાં વધુ એક હત્યાનો બનવા પામ્યો છે. ગરોડિયા ગામની અવાવરૂ જગ્યા પર જમીન દલાલની હત્યા કરાયેલ મૃતદેહ મળી આવતા બોપલ પોલીસે આરોપીને પકડવા તપાસ હાથ ધરી છે. 

લોહીથી લથપથ જગ્યા...પથ્થર પર લોહી...હત્યા કરેલ મૃતદેહ અને અવાવરૂ જગ્યામાં તપાસ કરતી પોલીસ. અમદાવાદ જિલ્લાના બોપલ પોલીસ સ્ટેશન વિસ્તારના ગરોડિયા ગામ ના જ્યા અમદાવાદના થલતેજ વિસ્તારમાં રહેતા દીપક ભાઈ દશરથ ભાઈ પટેલનો મૃતદેહ મળી આવ્યો છે. મૃતક દીપકભાઈ પટેલના માથાના ભાગે ઊંડો ઘા મારીને હત્યા નિપજવા માં આવી હોવાનું પ્રાથમિક નજરે દેખાય રહ્યું છે, ત્યારે હત્યા કઈ પરિસ્થિતિમાં થઇ? કોણે કરી? કેમ કરી? આવા તમામ સવાલોના જવાબ શોધવા માટે બોપલ પોલીસ મથી રહી છે. 

જાણવા મળ્યું છે કે મૃતક દીપકભાઈ પટેલ ગઈ રાત્રે એક કલાકમાં ઘરે પરત આવી જાવ છું એવું કહીને નીકળ્યા હતા, ત્યારે મોડી રાત્રિ સુધી પરત ના આવતા અમેરિકા રહેતા બાળકોએ પિતાના આઇફોનમાં ફાઈન્ડ માય ફોન એપ્લિકેશનમાંથી ટ્રેકિંગ કર્યા. દીપકભાઈ પટેલનું લોકેશન ગરોડીયા ગામની સીમમાં મળી આવ્યું હતું.

વહેલા સવારે સગા સબંધી આ લોકેશન પણ પહોંચતા દીપકભાઈ પટેલનો મૃતદેહ મળી આવ્યો હતો. ત્યારે સગાઓએ બોપલ પોલીસને જાણ કરતા બોપલ પોલીસે હત્યારાનું પગેરું મેળવવા પ્રયાસ હાથ ધર્યા છે.