આદિવાસી સમાજના હિતમાં ગુજરાત સરકારનો હિતકારી નિર્ણય, હવે આ યોજના રદ થશે

ઝી ન્યૂઝ/ગાંધીનગર: પાર-તાપી રિવર લિંક યોજનાને લઈને રાજ્ય સરકાર દ્વારા એક મહત્વપૂર્ણ નિર્ણય લેવામાં આવ્યો છે. પાર-તાપી રિવર લિંક યોજના હવે રાજ્ય સરકાર રદ કરશે. દક્ષિણ ગુજરાતના આદિવાસી સમાજના લોકોએ આ વિશે રજૂઆત કરી હતી. સ્થાનિકોએ સી.આર.પાટીલ, CMને રજૂઆત કરી હતી. રિવરલિંક યોજના શક્ય ન હોવાની સ્થાનિકોએ રજૂઆત કરી હતી. તમને જણાવી દઈએ કે કેન્દ્ર સરકારે બજેટમાં આ યોજનાની જાહેરાત કરી હતી. આદિવાસી સમાજના હિતમાં રાજ્ય સરકાર આ યોજનાને રદ કરશે.

આ વિશે મળતી માહિતી પ્રમાણે રાજ્યના મુખ્યમંત્રી ભૂપેન્દ્ર પટેલે પાર-તાપી યોજના અંગે આદિજાતિ બાંધવોના પ્રશ્નો અને રજૂઆતોનું નિવારણ લાવવા માટે એક હિતકારી નિર્ણય લીધો છે. મુખ્યમંત્રી ભૂપેન્દ્ર પટેલે જણાવ્યું હતું કે, સુચિત પાર-તાપી યોજના અંગે આદિજાતિ બાંધવોના પ્રશ્નો–રજૂઆતોનું  નિવારણ લાવવા રાજ્ય સરકાર પ્રતિબદ્ધ છે. મુખ્યમંત્રીએ કહ્યું કે, પાર-તાપી યોજના અંગેની આદિજાતિ બાંધવોની રજૂઆતો અને સમસ્યાઓને સંપૂર્ણપણે સમજીને તેમના હિતમાં હોય તેવું નિરાકરણ લાવીશું. 

મુખ્યમંત્રીએ આ સંદર્ભે રાજય સરકાર કેન્દ્ર સરકારમાં રજૂઆત કરશે, તેવી આદિજાતિ સમાજને ખાતરી આપી અને જણાવ્યું કે, રાજય સરકાર આદિજાતિઓના હિતોની રક્ષા માટે સદૈવ કટિબદ્ધ છે.