ગુજરાત ભાજપ પ્રદેશ પ્રમુખની ચૂંટણીને લઈને મહત્વના સમાચાર : ચૂંટણી અધિકારીની કમાન આ નેતાને સોંપાઈ

BJP Election Officers: ભારતીય જનતા પાર્ટી (BJP) એ ગુરુવારે પ્રદેશ પ્રમુખો અને રાષ્ટ્રીય પરિષદના સભ્યોની ચૂંટણી માટે ચૂંટણી અધિકારીઓની જાહેરાત કરી છે. કેન્દ્રીય મંત્રીઓ સહિત વરિષ્ઠ નેતાઓને પોતપોતાના રાજ્યોમાં આંતરિક ચૂંટણીઓનું સુચારું સંચાલન સુનિશ્ચિત કરવાની જવાબદારી સોંપવામાં આવી છે. જેમાં કેન્દ્રીય મંત્રી ભુપેન્દ્ર યાદવની ગુજરાતના પ્રદેશ પ્રમુખની ચૂંટણી અધિકારી તરીકે નિયુક્તિ કરાઈ છે. તો ફરીથી પૂર્વ મુખ્યમંત્રી વિજય રૂપાણીને ફરી મોટી જવાબદારી સોંપાઈ છે. રાજસ્થાન ભાજપના પ્રદેશ પ્રમુખની પસંદગી માટે ગુજરાતના પૂર્વ મુખ્યમંત્રી વિજય રૂપાણીને ચૂંટણી અધિકારી બનાવાયા છે.

પીયૂષ ગોયલ ઉત્તર પ્રદેશના ચૂંટણી અધિકારી બન્યા છે, જ્યારે બિહારના મનોહર લાલ ખટ્ટર અને ધર્મેન્દ્ર પ્રધાન મધ્યપ્રદેશના ચૂંટણી અધિકારી બન્યા છે. સુનિલ બંસલને ગોવાના ચૂંટણી અધિકારી અને ભૂપેન્દ્ર યાદવને ગુજરાતના ચૂંટણી અધિકારી બનાવવામાં આવ્યા છે. શિવરાજસિંહ ચૌહાણને કર્ણાટકના ચૂંટણી અધિકારી તરીકે નિયુક્ત કરવામાં આવ્યા હતા.

એ જ રીતે મિઝોરમ માટે વનાતિ શ્રીનિવાસન, નાગાલેન્ડ માટે વી. મુરલીધરન, ઓડિશા માટે સંજય જયસ્વાલ, પુડુચેરી માટે તરુણ ચુગ, રાજસ્થાન માટે વિજય રૂપાણી, સિક્કિમ માટે કિરણ રિજિજુ, તમિલનાડુ માટે જી. કિશન રેડ્ડી, તેલંગાણા માટે કુમારી શોભા કરંદલાજે અને ત્રિપુરા માટે જુઅલ ઓરામને રિટર્નિંગ ઓફિસર નિયુક્ત કરવામાં આવ્યા છે.

જાન્યુઆરીમાં પ્રદેશ પ્રમુખ બદલાશે
ભાજપના બંધારણ મુજબ રાષ્ટ્રીય અધ્યક્ષની પસંદગી કરતા પહેલા 50 ટકા રાજ્યોમાં સંગઠનની ચૂંટણી થવાની છે. રાજ્યોના પ્રદેશ પ્રમુખોની પણ 15 જાન્યુઆરી સુધીમાં ચૂંટણી થવાની છે. આ પછી રાષ્ટ્રીય અધ્યક્ષની ચૂંટણીની પ્રક્રિયા શરૂ કરવામાં આવશે.