હે ભગવાન ગુજરાતમાં શું થવા બેઠું છે? સરકારી હોસ્પિટલમાં સફાઈકર્મીઓ પાસે કરાવાય છે પોસ્ટમોર્ટમ!

પ્રશાંત ઢીવરે/સુરત: સુરત મહાનગર પાલિકા સંચાલિત સ્મીમેર હોસ્પિટલમાં સફાઇ કર્મીઓ જ PM કરતાં હોવાની ફરિયાદ સફાઈ કામદાર યુનિયન દ્વારા કરવામાં આવી છે. આ બાબતે પાલિકા કમિશનરને આવેદનપત્ર અપાયું છે અને કર્મચારીઓ પાસે બળજબરીથી કામ કરાવતા હોવાનો આરોપ લગાવાયો છે. કર્મીઓ દ્વારા પીએમ કરતા હોવાનો વિડીયો પણ સામે આવ્યો છે.

સુરત મહાનગર પાલિકા સંચાલિત સ્મીમેર હોસ્પિટલમાં પોસ્ટમોર્ટમની કામગીરી સ્મીમેર હોસ્પિટલના ડોકટરો એમબીબીએસ ડોકટરો નથી કરતા અને આ તબીબોની જગ્યા પર પોસ્ટમોર્ટમની કામગીરી સફાઇ કામદારો પાસે કરાવતા હોવાની ફરિયાદ પાલિકા કમિશનરને કરવામાં આવી છે. આ અંગે અખિલ ભારતીય સફાઇ કામદાર સંગઠને પાલિકા કમિશનરને આવેદનપત્ર આપી રજૂઆત કરી છે.

અખિલ ભારતીય કામદાર સંગઠને કરેલી રજૂઆતમાં જણાવ્યું છે કે, પોસ્ટમોર્ટમ કરતી વેળાએ વિડીયો શુટીંગ કરવામાં આવે છે. મૃતકના વિશેરા બંધ ડબ્બામાં દવા નાંખી લેબમાં મોકલવાની કામગીરી સીનીયર ડોકટર એમ.ડી. પેથોલોજીસ્ટની દેખરેખ હેઠળ સહાયક ડોકટરો દ્વારા કરવાની હોય છે. પરંતુ સ્મીમેરમાં સિનિયર ડોકટર કે સહાયક ડોકટર આવી કોઇ કામગીરી કરતા નથી અને પોસ્ટમોર્ટમ વિભાગમાં વર્ગ:4ના સફાઇ કામદારો દ્વારા પોસ્ટમોર્ટમની કામગીરી કરાઇ છે. 

સફાઇકામદારોની મૂળ કામગીરી પોસ્ટમોર્ટમ વિભાગમાં થતી ગંદકીની સફાઇ કરવાની હોય છે. પોસ્ટમોર્ટમમાં વપરાતા સર્જીકલ બ્લેડનો ઉપયોગ ખાસ કરીને ડોકટરોએ કરવાનો હોય છે, પરંતુ સફાઇ કામદારો પાસે જબરજસ્તીથી કામગીરી કરાવાય છે. 

સફાઈ કર્મચારીઓ દ્વારા પીએમ રૂમની કામગીરી કરતા હોવાનો વિડિયો પણ સામે આવ્યો છે. જ્યારે કામદાર યુનિયન દ્વારા મહાનગરપાલિકાના કમિશનર સહિત લાગતા અધિકારીઓને આ કામગીરી અટકાવવાની સાથે યોગ્ય દિશામાં તપાસ કરવાની માંગ કરાઈ છે. હવે જોવું એ રહેવું કે તંત્ર કસૂરવારો સામે કયા પ્રકારની કાર્યવાહી હાથ ધરશે.