ધોરણ-10માં સૌથી વધુ પર્સન્ટાઈલ લાવનાર આ વિદ્યાર્થીનીઓની સ્ટોરી તમને રડાવી દેશે...

અમિત રાજપૂત/અતુલ તિવારી/અમદાવાદ :ધોરણ 10ની પરીક્ષાનું પરિણામ જાહેર થઈ ગયું છે. વેબસાઈટ પર ધોરણ-10નું રિઝલ્ટ જાહેર થઈ ગયું છે. રિઝલ્ટ આવતા જ પાસ થનારા વિદ્યાર્થીઓમાં ખુશીનો માહોલ જોવા મળ્યો છે. પણ, આ રિઝલ્ટમાં સારુ રિઝલ્ટ મેળવનારા કેટલાક વિદ્યાર્થીઓ એવા પણ છે, જેઓને પરીક્ષા પાસ કરવા માટે આકરી પરિસ્થિતિમાંથી પસાર થવુ પડ્યું હતું. વિકટ પરિસ્થિતિમાં પણ ઝઝૂમીને સારા પર્સન્ટાઈલ મેળવનારા આ વિદ્યાર્થીઓની સફળતાને સલામ છે...

ભાઈએ અગરબત્તી અને ઝેરોક્સની દુકાન ચલાવીને બહેનને ભણાવી
અમદાવાદની નવરંગ સ્કૂલમાં ભણતી ઋત્વી સોનીની કહાની તો અત્યંત દુખદાયક છે. 6 વર્ષ પહેલા જ તેના પિતાનું ટીબીથી મોત થયુ હતું. ત્યારે માતા અને ભાઈએ પેટે પાટા બાંધીને ઋત્વીને ભણાવી હતી. ભાઈએ અગરબત્તી અને ઝેરોક્સની દુકાન ચલાવી બહેનને ભણાવી છે. જેથી ઋત્વીએ 98.81 પર્સન્ટાઈલ મેળવીને માતા-ભાઈને અનોખી ભેટ આપી છે. સારું પરિણામ મેળવવા મટે દિવસના 14થી 15 કલાક મહેનત કરી હતી. હાલ તે તેના સ્વર્ગસ્થ પિતાનુ સપનુ પૂરુ કરવા માટે તનતોડ મહેનત કરી રહી છે. તેના પિતાનું સપનું જીપીએસસી-યુપીએસસી પરીક્ષા પાસ કરાવવાનું હતું. તેથી ઋત્વી પણ એ મુજબ ભણવામાં આગળ વધશે.