2 વર્ષની કોમળ ફૂલ જેવી દીકરીને સાથે રાખીને કોરોનામાં ડ્યુટી કરે છે મહિલા કોન્સ્ટેબલ

ઝી મીડિયા/બ્યૂરો :ગુજરાતમાં કોરોના વાયરસનો આંકડો બેવડી સદી તરફ વધી રહ્યો છે. જ્યારે કે, મોતના આંકડામાં પણ ધીમે-ધીમે વધારો થઈ રહ્યો છે. અમદાવાદમાં રાજ્યમાં સૌથી વધારે કેસ નોંધાઈ ચૂક્યા છે. જે એક કે બે દિવસમાં સદી ફટકારી દેશે. જ્યારે બીજા શહેરો સુરત, ભાવનગર, ગાંધીનગર, વડોદરા અને રાજકોટમાં કેસોની સંખ્યા વધી રહી છે. જે ગુજરાત માટે મોટી ખતરાની ઘંટડી સમાન છે. ત્યારે કોરોના (corona virus) ને અટકાવવા માટે પોલીસ વિભાગ શું કામગીરી કરી રહી છે? પોતાનો જીવ જોખમમાં મૂકીને પરિવારની ચિંતા કર્યા વિના લોકોની સેવા કરતી પોલીસ કેવી મુશ્કેલીઓ વચ્ચે ફરજ બજાવે છે તે જોઈએ. 

અલકા દેસાઈ પશ્વિમ કચ્છ-ભુજ પોલીસમાં મહિલા કોન્સ્ટેબલ તરીકે ફરજ પણ બજાવે છે. તેમજ સાથે એક માતા તરીકેની પણ ભૂમિકા ભજવે છે. અલકા દેસાઈ અને તેમના પતિ બંને પોલીસમાં ફરજ બજાવે છે. બંનેને બે વર્ષની કોમળ ફૂલ જેવી દીકરી છે. પોલીસમાં ફરજ બજાવતા અલકા દેસાઈ સાથે ફરજ પર તેમની બે વર્ષની પુત્રી જિયાને પણ સાથે રાખે છે. એક બાજુ કોરોના જેવી મહામારી ચાલી રહી છે. તેમ છતાં 2 વર્ષની સુંદર બાળકીને લઈને પોતાની ફરજ બજાવવી પડી રહી છે. કેમ કે ઘરે તેને કોઈ રાખી શકે તેમ નથી. હાલ કોરોનાને લઈને સમગ્ર પોલીસ સ્ટાફ 24 કલાક ખડેપગે છે. જેના કારણે બંને પતિ-પત્નીને ફરજ પર હાજર રહેવું પડે છે.