આને કહેવાય પાક્કી દોસ્તી, એકસાથે બેસીને જમે ગુજરાતના આ PSI અને કપિરાજોનું ટોળું

Animal Lover : વાત લાગણીની હોય તો ગમે તે સાથે લાગણી બંધાઈ જાય છે. તેમાં પણ મનુષ્ય અને પ્રાણીઓની દોસ્તી આદિકાળથી ચાલતી આવે છે. તેમની દોસ્તીના ઉદાહરણો આપવામાં આવે છે. આવું જ એકવાર ફરીથી જોવા મળ્યું છે. છોટાઉદેપુર જિલ્લાના સંખેડાના પીઆઈ હાલ પ્રાણી સાથેની મિત્રતાને કારણે ચર્ચામાં છે. સંખેડાના પીએસઆઈ અજય ડામોરનો કપિરાજ સાથે નાતો અનેરો છે. તેમની કપિરાજો સાથે એવી દોસ્તી છે કે, તેમને જોઈને કપિરાજ દોડતા આવે છે. 

પીએસઆઈ અજય ડામોર છોટાઉદેપુર જિલ્લાના સંખેડામાં કાર્યરત છે. તેમની કપિરાજ સાથે બેસીને નાસ્તો કરતી તસવીરો વાયરલ થઈ છે. તેમની ઘર પાસે રહેતા કપિરાજ તેમની આતુરતાથી રાહ જોઈને બેસ્યા હોય છે. જેમ અજય ડામોર દરવાજો ખોલીને બહાર આવે કે તરત વાનરોનું ટોળું તેમની પાસે આવી ચઢે છે. કપિરાજ અને અજય ડામોર જાણે સુખદુખના સાથી હોય તેમ સાથે બેસીને નાસ્તો કરે છે. 

આ લાગણી કેવી રીતે બંધાઈ તે વિશે અજય ડામોર કહે છે કે, હેલા વાનર ઘરમાં આવી જે પણ ખાવાનું મળે એ લઈને ભાગી જતા હતા અને ભગાડવાનો પ્રયત્ન કરે તો તેઓ સામે હુમલો કરવા દોડતા હતા. પરંતુ બાદમાં મેં તેમની સાથે મિત્રતા બાંધવાનો પ્રયાસ કર્યો. તેમની પ્રેમથી બિસ્કીટ આપવાનું શરૂ કર્યું. ડર્યા વિના હું તેમની પાસે બિસ્કીટ આપવા જતો. બાદમાં પલાળેલા ચણા આપવાનું શરૂ કર્યું. આ રીતે કપિરાજે હુમલો કરવાનુ ઓછું કર્યું. આજે અમે સારા મિત્ર બની ગયા છીએ. 

આજે સ્થિતિ એવી છે કે, પીએસઆઈ અજય ડામોર જ્યારે પોલીસ સ્ટેશન આવે ત્યારે કપિરાજ આતુરતાથી રાહ જોતા હોય છે. હવે તેઓ મિત્રો બની ગયા છે. અજય ડામોરના ઘરનો દરવાજો બંધ હોય તો વાંદરાઓનું ઝુંડ આવીને તેમનો દરવાજો પણ ખખડાવે છે.

પ્રાણીઓ અને મનુષ્યની મિત્રતા આદિકાળથી ચાલતી આવી છે. વર્તમાન સ્થિતિએ સમયના અભાવે માણસ માણસ વચ્ચેના સબંધ ઓછા થતા જાય છે. ત્યારે કપિરાજ અને પીએસઆઈની અદ્દભુત મિત્રતા પ્રાણી પ્રેમનો અનોખો સંદેશ આપે છે.