ગરમી અને ઉકળાટમાં રાહતના સમાચાર, આગામી 5 દિવસમાં પડશે ભારેથી અતિભારે વરસાદ

અર્પણ કાયદાવાલા/અમદાવાદઃ રાજ્યમાં છેલ્લા ત્રણ-ચાર દિવસથી સૌરાષ્ટ્ર અને દક્ષિણ ગુજરાતમાં ધોધમાર વરસાદ પડી રહ્યો છે, પરંતુ ઉત્તર ગુજરાત અને મધ્ય ગુજરાતે હજુ સુધી વરસાદ જોયો જ નથી. હવે હવામાન ખાતાએ કરેલી આગાહી મુજબ આગામી 5 દિવસમાં રાજ્યમાં વ્યાપક વરસાદ પડવાની સંભાવના છે. દક્ષિણ ગુજરાત, મધ્ય ગુજરાત, ઉત્તર ગુજરાત, સૌરાષ્ટ્ર સહિતના તમામ જિલ્લાઓમાં વરસાદ પડશે. 

ગુજરાતમાં દક્ષિણ-પશ્ચિમ ચોમાસું વરસાદ લાવતું હોય છે. આ વખતે વરસાદ ખેંચાઈ ગયો છે. હવામાન ખાતાના જણાવ્યા અનુસાર અત્યારે બંગાળની ખાડીમાં હવાનું હળવું દબાણ સર્જાયું છે. આ સાથે જ રાજ્ય ઉપર અપરએર સાયક્લોનિક સર્ક્યુલેશન પણ સર્જાયું છે. જેની અસર પણ રાજ્યના હવામાન પર થશે. 

હવામાન ખાતાએ ભારેથી અતિભારે વરસાદની સંભાવનાને પગલે માછીમારોને પણ દરિયો ન ખેડવા ચેતવણી આપી છે. સાથે જ જણાવ્યું છે કે, અત્યાર સુધી રાજ્યના જે જિલ્લાઓમાં વરસાદ પડ્યો નથી ત્યાં પણ વરસાદ પડશે એવી આગાહી હવામાન ખાતાએ કરી છે. 

અમદાવાદ હવામાન વિભાગના ડિરેક્ટર ડો. જયંત સરકારે આ અંગે જણાવ્યું કે, " એક લો પ્રેસર બન્યું છે અને તેની સાથે જ એક સાયકલોનીક સર્ક્યુલેશન પણ સર્જાયું છે. જેનાથી રાજ્યમાં આગામી 4 દિવસ દરમિયાન ઉત્તર, મધ્ય અને દક્ષિણ ગુજરાત તથા સૌરાષ્ટ્રમાં સારો વરસાદ પડશે. વલસાડ, નવસારી, ડાંગ અને દાદરા નગર હવેલીમાં ભારેથી અતિભારે વરસાદ પડશે. આ સાથે જ આગામી 4 દિવસ દરમિયાન સાબરકાંઠા, અરવલ્લી, વલસાડ, બનાસકાંઠા, સાબરકાંઠા, દાહોદ તેમજ સૌરાષ્ટ્રમાં પણ ભારે વરસાદની સંભાવના છે."

જૂઓ LIVE TV....