અમદાવાદીઓ આનંદો! ગણેશ ચતુર્થી પર લોન્ચ થયું Jio Air Fiber, 8 શહેરોમાં અમદાવાદનો સમાવેશ

Reliance Jio Air Fiber: રિલાયન્સ જિયોએ આજે ​​19મી સપ્ટેમ્બરે ગણેશ ચતુર્થીના દિવસે તેની એર ફાઈબર સેવા શરૂ કરી છે. હાલમાં આ સેવા અમદાવાદ, બેંગલુરુ, ચેન્નાઈ, દિલ્હી, હૈદરાબાદ, કોલકાતા, મુંબઈ અને પુણે - 8 શહેરોમાં ઉપલબ્ધ રહેશે. એર ફાઈબર માટે 1000 રૂપિયા ઈન્સ્ટોલેશન ચાર્જ ચૂકવવો પડશે. તમે તેને 100 રૂપિયામાં બુક કરાવી શકો છો. આ રકમ બિલમાં એડજસ્ટ કરવામાં આવશે.

એર ફાઈબર બુક કરવા માટે તમારે Jioની ઓફિશિયલ વેબસાઈટ પર જવું પડશે. કનેક્શનની સાથે, તમને નવીનતમ Wi-Fi રાઉટર, ટીવી માટે 4K સેટ ટોપ બોક્સ અને વૉઇસ એક્ટિવેટેડ રિમોટ મળશે. તમામ પ્લાન 6 અને 12 મહિનાના વિકલ્પોમાં ઉપલબ્ધ છે. જો તમે 12 મહિનાનો પ્લાન લો છો તો તમારે 1000 રૂપિયાનો ઈન્સ્ટોલેશન ચાર્જ ચૂકવવો પડશે નહીં.

એર ફાઈબર ગમે ત્યાં લઈ શકાય છે
એર ફાઇબરની વિશેષતા તેની પોર્ટેબિલિટી છે. વપરાશકર્તાઓ તેને કોઈપણ સ્થાન પર લઈ જઈ શકે છે અને તેનો ઉપયોગ કરી શકે છે. જોકે 5G કનેક્ટિવિટી હોવી જોઈએ. રિલાયન્સ જિયોના જણાવ્યા અનુસાર, તેમનું એર ફાઈબર સફરમાં હોય ત્યારે બ્રોડબેન્ડ જેવી સ્પીડ પ્રદાન કરવામાં સક્ષમ છે.

દૂરના વિસ્તારોમાં હાઈ-સ્પીડ ઈન્ટરનેટ સરળતાથી ઉપલબ્ધ થશે
હાલમાં, Jio, Airtel અને અન્ય કંપનીઓની ઓપ્ટિક વાયર ટેક્નોલોજી પર આધારિત ફાઈબર શહેરો પૂરતું મર્યાદિત છે, પરંતુ એર ફાઈબર કોઈપણ વાયર વિના ઈન્ટરનેટ પ્રદાન કરે છે. આવી સ્થિતિમાં એર ફાઈબર દ્વારા દૂરના વિસ્તારોમાં હાઈ-સ્પીડ ઈન્ટરનેટ સરળતાથી ઉપલબ્ધ થશે.

Jio Fiber અને Jio Air Fiber વચ્ચે શું તફાવત છે?
Jio ફાઈબર ઓપ્ટિક વાયર ટેક્નોલોજી પર આધારિત છે. આના દ્વારા ઇન્ટરનેટ પ્રદાન કરવા માટે, કંપની ઘર/ઓફિસમાં રાઉટર ઇન્સ્ટોલ કરે છે. ઓપ્ટિક વાયરને તે રાઉટર સાથે જોડે છે. આ પછી, ફાઇબર સ્થિર હાઇ-સ્પીડ ઇન્ટરનેટ પ્રદાન કરે છે.

કંપની એર ફાઈબર દ્વારા વાયરલેસ બ્રોડબેન્ડ સેવા પૂરી પાડી રહી છે. તે વાયરલેસ ડોંગલની જેમ કામ કરે છે, પરંતુ ઇન્ટરનેટની ઝડપ ઘણી વધારે છે. આ માટે કોઈપણ પ્રકારના ઈન્ફ્રાસ્ટ્રક્ચરની જરૂર નથી. તે સરળતાથી સ્થાપિત થાય છે.

એરટેલ પહેલાંથી જ એર ફાઈબર લોન્ચ કરી ચૂકી છે
એરટેલ પહેલા જ દિલ્હી અને મુંબઈમાં એક્સ્ટ્રીમ એર ફાઈબર લોન્ચ કરી ચૂકી છે. કંપનીનો દાવો છે કે એરટેલ એક્સ્ટ્રીમ એર ફાઈબર વાઈ-ફાઈ 5 રાઉટર કરતાં 50% વધુ ઝડપી ઈન્ટરનેટ સ્પીડ પ્રદાન કરે છે. દેશના અન્ય ભાગોમાં એરટેલ એક્સ્ટ્રીમ એર ફાઇબર ક્યારે ઉપલબ્ધ થશે તે અંગે કંપનીએ હજુ સુધી માહિતી આપી નથી.

તમે ₹7,733માં Airtel Extreme Air Fiber ખરીદી શકો છો
ખરીદદારો 7,733 રૂપિયા ચૂકવીને એરટેલ એક્સ્ટ્રીમ એર ફાઇબર ખરીદી શકે છે, જેમાં અલગથી 18% GST શામેલ છે. આમાં, કંપની 6 મહિનાના ડેટા પ્લાન માટે ₹2,500 અને ₹4,435ની સિક્યોરિટી ડિપોઝિટ લઈ રહી છે.