CoronaVirus : ‘થાય એટલું ભેગુ કરો...’ની વૃત્તિ ગુજરાતમાં પણ શરૂ, માસ્કની કાળાબજારી થવા લાગી

જાવેદ સૈયદ/અમદાવાદ :કોરોના વાયરસ (corona virus) નો ગુજરાતમાં પગપેસારો થતા જ રાજ્યમાં માસ્ક અને સેનીટાઈઝર (sanitizer) ની કાળા બજારી શરૂ થઈ ગઈ છે. 2 રૂપિયાના માસ્ક (mask) ના 20થી 30 રૂપિયા વસૂલવામાં ફાર્માસિસ્ટ જરાય શરમ નથી અનુભવી રહ્યાં છે. ત્યારે રાજ્ય સરકારના આદેશ બાદ ફૂડ એન્ડ ડ્રગ્સ વિભાગના કમિશનરે રાજ્યના અનેક મેડિકલ સ્ટોરમાં કાર્યવાહી હાથ ધરી અને બંધ કરાવી છે. આ સાથે જ રાજ્ય સરકારે પણ ચેતવણી આપી છે કે લોકોને જરૂરિયાતની વસ્તુ વેચવામાં કાળા બજારી કરતું ઝડપાશે તો તેમની સામે કાર્યવાહી કરાશે. જરૂર પડ્યે દુકાન પણ સીલ કરાશે. 

કોરોના વાયરસનો હાવ એટલો બધો છે કે લોકો કાળા બજારીના ડરથી જેટલુ ભેગુ થાય તેટલું ઘરમાં ભેગુ કરી રહ્યાં છે. વાયરસથી બચવા ફેસ માસ્કના ભાવમાં 5 ગણાનો વધારો થઈ ગયો છે અને કાળા બજારી શરૂ થઈ ગઈ છે. લોકો પણ જરૂરિયાત હોવાથી વધુ રૂપિયા ચૂકવી ખરીદી રહ્યાં છે. અમદાવાદમાં પણ આવી કાળા બજારી શરૂ થઈ હોવાનો ખુદ મેડિકલ સ્ટોર માલિકો સ્વીકાર કરી રહ્યાં છે.