વાવાઝોડા વચ્ચે વરદાયિની માતાએ પોતાની હાજરીનો પરચો આપ્યો, ધજામાં થયો ચમત્કાર

Gujarat Weather Forecast હિતલ પારેખ/ગાંધીનગર : હાલ સમગ્ર ગુજરાત વાવાઝોડા અને વરસાદની બાનમાં છે. લોકો મુશ્કેલીમાં મૂકાયા છે. કુદરત કહેર વરસાવી રહ્યું છે. આવામાં એક ચમત્કાર જોવા મળ્યો છે. ગાંધીનગરમાં પલ્લી માટે પ્રખ્યાત રૂપાલના વરદાયિની માતાએ પોતાની હયાતીનો પરચો આપ્યો છે. વાવાઝોડાના પ્રકોપ વચ્ચે ચમત્કાર જોવા મચ્યો છે. ભક્તો આ ઘટનાને માતાનો પરચો ગણાવી રહ્યાં છે.  

બે અલગ દિશામાં ફરકી માતાની ધજા
આજે રાજ્યના પાટનગરમાં પણ વરસાદી માહોલ જામ્યો છે. ઉત્તર ગુજરાતમાં પડી રહેલા વરસાદની જેમ ગાંધીનગરમાં વરસાદ વરસી રહ્યો છે. ગાંધીનગરમાં હળવાથી ભારે વરસાદી ઝાપટા સવારથી પડી રહ્યા છે. તો પવન ફૂંકાયો છે. આ વચ્ચે રૂપાલે ગામે આવેલ વરદાયિની માતાના મંદિરમાં કૌતુહલ જન્માવે તેવી ઘટના બની છે. મંદિર પરની બે ધજા વિરોધી દિશામા લહેરાયેલી જોવા મળી છે. ભારે પવન હોવા છતાં બે ધજા અલગ અલગ દિશામાં ફરકે છે. 

આજે વરસાદની ક્યાં ક્યાં આગાહી 
હવામાન વિભાગના લેટેસ્ટ અપડેટ અનુસાર, ઉત્તર ગુજરાતમાં બનાસકાંઠા પાટણ મહેસાણા અને સાબરકાંઠામાં રેડ એલર્ટ આપવામાં આવ્યું છે. 41 સી 61 કિલોમીટરની ઝડપે પવન અને થંડર સ્ટોર્મ એક્ટિવિટી સાથે ઉત્તર ગુજરાતમાં ભારે વરસાદ તૂટી પડશે. તો કચ્છ પર હજી પણ ઘાત છે. કચ્છ, સુરેન્દ્રનગર, ગાંધીનગર, અરવલ્લી અને મહીસાગરમાં 41 થી 61 કિલોમીટરની ઝડપે પવન ફૂંકાશે. તેમજ થંડર સ્ટોર્મ એક્ટિવિટી સાથે સામાન્ય વરસાદ રહેશે. તો રાજ્યના દેવભૂમિ દ્વારકા, જામનગર, મોરબી, રાજકોટ, પોરબંદર, જુનાગઢ, ગીર સોમનાથ, દીવ, અમરેલી, ભાવનગર, બોટાદ, અમદાવાદ, આણંદ, ખેડા, વડોદરા, પંચમહાલ, દાહોદ, છોટાઉદેપુર, નર્મદા, ભરૂચ, સુરત, નવસારી, વલસાડ, દમણ, દાદરા નગર હવેલીમાં 40 કિલોમીટરની ઝડપે પવન સાથે છૂટો છવાયો વરસાદ રહેશે.