ટેરર ફંડિંગ: NIAએ FIFના સુરત સહિત દેશભરમાં 8 સ્થળો પર તપાસ હાથ ધરી, મહત્વના દસ્તાવેજો મળ્યાં

તેજશ મોદી, સુરત: નેશનલ ઈન્વેસ્ટિગેશન એજન્સીએ આજે પાકિસ્તાન સ્થિત ફલાઈ ઈન્સાનિયત ફાઉન્ડેશનના સુરત અને વલસાડ સહિત દેશભરના આઠ સ્થળો પર તપાસ ચલાવી છે. આ તપાસ દરમિયાન મહત્વના દસ્તાવેજો મળી આવ્યાં છે. દેશના 5 રાજ્યોના કુલ 8 સ્થળો પર તપાસ કરાઈ જેમાં કેરળના કસરગોડ, યુપીના ગોંડા, રાજસ્થાનના સિકર અને જયપુર, દિલ્હી સામેલ છે. અત્રે જણાવવાનું કે બે દિવસ પહેલા જ આરોપી મોહમ્મદ હુસૈન મોલાનીની જયપુર એરપોર્ટ પરથી ધરપકડ કરાઈ હતી. તે દુબઈથી આવી રહ્યો હતો. આ સંસ્થાનું નામ લશ્કર એ તૈયબા સાથે સંકાળાયેલું હોવાનું કહેવાય છે. 

મળતી માહિતી મુજબ આ તપાસ દરમિયાન મહત્વના  દસ્તાવેજોની સાથે સાથે  3 વિદેશી સીમકાર્ડ સહિત 26 સીમકાર્ડ જપ્ત કરાયા. આ ઉપરાંત 23 મોબાઈલ, 5 મેમરીકાર્ડ, 1 કોમ્પેક ડિસ્ક, 5 હાર્ડડિસ્ક 1 પેનડ્રાઇવ, 1 DVR, 1 CPU, 8 પાસપોર્ટ અને ફોરેનકાર્ડ,  9 ડેબિટકાર્ડ, 1 લેપટોપ અને 21 લાખ રોકડા જપ્ત કરાયા. 2 કિલો સોનાના દાગીના પણ જપ્ત કરવામાં આવ્યા છે. દુબઈ કનેક્શન સહિતના દસ્તાવેજી પણ મળી આવ્યા. અત્યાર સુધીમાં ચાર લોકોની કરાઈ છે ધરપકડ કરાઈ છે. 

અત્રે જણાવવાનું કે FIF ટેરર ફંડિંગ કેસ એનઆઈએ દ્વારા 2જી જુલાઈ 2018ના રોજ દાખલ કરાયો હતો. એફઆઈઆર મુજબ કેટલાક દિલ્હી સ્થિત શખ્સો આ વિદેશ સ્થિત આ સંસ્થા દ્વારા ફંડ મેળવતા હતાં અને તેનો ઉપયોગ આતંકી ગતિવિધિઓ માટે થતો હતો. બે દિવસ પહેલા પકડાયેલા આરોપી મૌલાનીની પૂછપરછ થઈ રહી હતી અને ત્યારબાદ આ સર્ચ હાથ ધરાઈ.