ઘરકંકાસની સજા 14 વર્ષની દીકરીને મળી! ધારિયાના ઘા ઝીંકી પત્નીનું ગળું કાપી હત્યા! ક્રૂરતાની હદ...

શૈલેષ ચૌહાણ/સાબરકાંઠા: વડાલીના સગરવાસમાં પતિ પત્નીને ઘરકંકાસને લઈને હત્યા કરી હોવાનું સામે આવ્યું છે. હાલ તો પોલીસે પતિની ધરપકડ કરીને જેલ હવાલે કર્યો છે.

સાબરકાંઠાના વડાલીના સગરવાસમાં ત્રણ દિવસ પહેલા સવારે પાંચેક વાગ્યાના સમયે પતિ પત્ની વચ્ચે કોઈપણ કારણોસર બોલાચાલી અને ઝઘડો થયા બાદ ધારિયાના ઘા ઝીંકી પત્નીનું ગળું કાપી નાખી નિર્મમ હત્યા કર્યા બાદ બપોર સુધી પોલીસને જાણ કરાઈ ન હતી. પરંતુ બપોર બાદ પોલીસને જાણ થતા તાત્કાલિક ઘટના સ્થળે પહોંચી લાશનો કબજો લઈ હાજર હત્યારા પતિની અટકાયત કરી પીએમ વગેરે માટે કાર્યવાહી હાથ ધરી. વડાલી પોલીસ સ્ટેશનમાં હત્યાનો ગુનો નોંધ્યો હતો.

વડાલીના સગરવાસમાં પાસે બ્રહ્મપુરી વિસ્તાર રહેતા લક્ષ્મીબેન મગનભાઈ સગર અને તેમના પતિ મગનભાઈ દેવકણભાઈ સગરે લઈને બુધવારે વહેલી સવારે પાંચેક વાગ્યાના સુમારે ઘર કંકાસને લઈને બોલચાલી બાદ ઝઘડો થવા દરમ્યાન મગનભાઈ એટલી હદે ગુસ્સે થઈ ગયા હતા કે ધારિયું લઈ આવી પત્નીના ગળા પર જીવલેણ ઘા મારી દાઢીના ભાગે ઘા ઝીંકી પત્નીને રહેંસી નાંખી વીસેક વર્ષના લગ્નજીવનનો અંત આણ્યો હતો અને 14 વર્ષની દીકરીને નોંધારી કરી હતી.

આ કરપીણ હત્યાની ઘટના છતાં કોઈએ પોલીસને જાણ કરી ન હતી. હત્યારો પતિ પણ ક્યાંય ફરાર થયો ન હતો. પરંતુ બપોરે દોઢેક વાગ્યાના સુમારે પોલીસને હત્યાની ઘટનાની જાણ થતા વડાલી પોલીસ ઘટનાસ્થળે પહોંચી ગઈ હતી. પોલીસે એફ.એસ.એલ.ની મદદથી તપાસ હાથ ધરી હતી અને લાશનો કબજો લઈ હત્યારા પતિની અટકાયત કરી જેલ હવાલે કરવામાં આવ્યો છે.