રાજકોટ શહેર બન્યું આકર્ષણનું કેન્દ્ર; લહેરાયો 250 ફૂટ લાંબો તિરંગો, 1 કિમી દૂરથી જ જોઈ શકાય

ઝી બ્યુરો/રાજકોટ: સમગ્ર દેશમાં આજથી હર ઘર તિરંગા અભિયાનની શરૂઆત થઈ છે. ત્યારે રાજકોટમાં રાજ્યનો સૌથી ઊંચો ત્રિરંગો લાગ્યો છે. 15મી ઓગસ્ટને લઈને રાજકોટવાસીઓમાં અનેરો ઉત્સાહ જોવા મળી રહ્યો છે. ત્યારે ગુજરાતની સૌથી ઊંચી રેસીડેન્સીયલ ઇમારત પર ત્રિરંગો લગાવવામાં આવ્યો છે. 

150 ફૂટ રિંગરોડ પર આવેલા સિલ્વર હાઇટ્સ એપાર્ટમેન્ટમાં ત્રિરંગો લગાવવામાં આવ્યો છે. આ ત્રિરંગો 250 ફૂટ અને 75 મીટર લાંબો અને 24 ફૂટ પહોળો છે. તમને જણાવી દઈએ કે આ બિલ્ડિંગ પર છેલ્લા 2 વર્ષથી આ ત્રિરંગો લગાવવામાં આવે છે. સિલ્વર હાઈટ્સમાં લગાવાયેલો ત્રિરંગો દૂર દૂર સુધી દેખાઈ રહ્યો છે. જેના કારણે રાજકોટ શહેર આકર્ષણનું કેન્દ્ર બન્યું છે.

આ વિશે મળતી માહિતી પ્રમાણે, રાજકોટમાં 250 ફૂટ લાંબો તિરંગો લહેરાવવામાં આવ્યો છે. આ તિરંગાની પહોળાઈ 24 ફૂટ છે તેમજ 22 માળના બિલ્ડિંગ પર લગાવાયો છે. જે 1 કિમી દૂરથી પણ જોઈ શકાય છે. રાજકોટ શહેરના નાના મવા રોડ પર આવેલી સિલ્વર હાઈટ્સ સોસાયટીના બિલ્ડિંગ ઉપર આ તિરંગો લહેરાવવામાં આવ્યો છે. અત્રે ઉલ્લેખનીય છે કે, જે સૌરાષ્ટ્રની સૌથી ઊંચી બિલ્ડિંગ છે.

નોંધનીય છે કે, ગુજરાતના દરેક જિલ્લાઓના લોકો આ અભિયાનમાં ઉત્સાહ પૂર્વક ભાગ લઈ દેશભક્તિના રંગે રંગાયા છે. અમદાવાદ, સુરત, વડોદરા, રાજકોટ સહિતના શહેરમાં લોકોએ ઘરો તેમજ ઓફિસ અને બિલ્ડિંગો ઉપર તિરંગો લહેરાવ્યો છે. ત્યારે રાજકોટમાં સૌરાષ્ટ્રનો સૌથી ઉંચો તિરંગો લગાવાયો છે.