વિદેશી પક્ષીઓને લાગ્યો સુરતી ગાંઠીયાનો ચટાકો, નદીની માછલી છોડીને ગાંઠીયા ખાવા લાગ્યા

Surat News ચેતન પટેલ/સુરત : શિયાળાની મજા માણવા હજારો કિલોમીટરનું અંતર કાપી વિદેશી પક્ષીઓ સૂર્યપુત્રી તાપી નદીના તટે આવી રહ્યાં છે. પરંતુ આના કરતાં મહત્વની વાત આ છે કે આ પક્ષીઓ સુરતી ગાંઠીયા ખાવા પડાપડી કરતા જોવા મળે છે. ગાંઠીયા માત્ર સુરતીઓ કે સુરતથી બહારથી આવનાર લોકોને જ નહીં પરંતુ વિદેશથી આવનાર પક્ષીઓને પણ આટલી હદે ગમી ગયા છે કે તેઓ જળના જીવ જંતુને ખાવાના બદલે આ ગાંઠીયા વધારે ખાવાનું પસંદ કરી રહ્યાં છે.

તાપી કાંઠો વિદેશી પક્ષીઓને ગમી ગયો 
આ ઓસ્ટ્રેલિયન પક્ષીઓ ખાસ કરીને પ્રજજન કરવા ટાપુ જેવા સ્થળો વધુ પસંદ કરતાં હોય છે. તાપી તટ આ પક્ષીઓનું મહત્વનું અનવ જાણીતું સ્થળ બની ચૂક્યું છે. જો કે આ વર્ષે શિયાળાની ગુલાબી ઠંડીની શરૂઆત મોડી થઈ છે તેની અસર પક્ષીઓ પર દેખાઈ રહી છે. સુરતમાં સૂર્યપુત્રી તાપી નદીનો તટ આમ તો રાજ્યમાં ઘણો પ્રખ્યાત છે. સુરતવાસીઓ માટે પણ આ સ્થળ ઘણું મહત્વનું માનવામાં આવે છે. દરમ્યાન આ સૂર્યપુત્રી તાપી નદીના તટની શોભા હાલ વિદેશી પક્ષીઓના આગમનથી વધી છે. રાજ્યમાં શિયાળાની ઋતુ શરૂ થતાની સાથે જ વિદેશી પક્ષીઓની મોટું ઝુંડ અહીં જોવા મળી રહ્યું છે. 

ઓસ્ટ્રેલિયન પક્ષીઓને ગમી ગયો ગુજરાતી નાસ્તો 
હજારો કિલોમીટરનું અંતર કાપી ઓસ્ટ્રેલિયાથી આવતા આ પક્ષીઓને બ્લેક હેડેડ ગલ અને બ્રાઉન હેડેડ ગલ તરીકે ઓળખવામાં આવે છે. સુરત શહેરના તાપી નદી આ પક્ષીઓ ગાંઠિયા ખાતા નજરે પડે છે. હજારોની સંખ્યામાં આવેલા પક્ષીઓ બ્રિજ ઉપર લોકો દ્વારા આપવામાં આવતા ગાંઠીયા ચટાકાતી ખાતા જોવા મળે છે. સુરતી ગાંઠીયા એમનો પ્રિય બની ગયો છે. આ પક્ષીઓના ઝુંડે પ્રજનન કરવા માટે તાપી નદીના તટને વધુ પસંદ કર્યો છે. સામાન્ય રીતે પક્ષીઓ માનવથી દૂર રહેતા હોય છે ,પરંતુ ઓસ્ટ્રેલિયાથી આવેલા આ પક્ષીઓના ઝુંડને માનવનો પણ કોઈ ડર ના હોય તેમ ગાંઠીયા માટે પડાપડી કરતા જોવા મળી રહ્યા છે.

માર્ચ સુધી રોકાશે 
ઉલ્લેખનીય છે કે દર વર્ષે આ પક્ષીઓ ઓક્ટોબરના અંતમાં કે નવેમ્બરની શરુઆતમાં આવી જતા હોય છે. પરંતુ ચાલુ વર્ષે શિયાળાની શરૂવાત દોઢ મહિનો મોડી થઈ છે. જેની અસર પક્ષીઓના આવવા પર ચોક્કસ થવા પામી છે. હાલ આ પક્ષીઓ હાલ સુરતના તાપી નદીના તટે રોકાયા છે. માર્ચ માસથી ઉનાળાની જેવી ઋતુ શરૂ થશે તેવી જ રીતે પક્ષીઓનું આ ઝુંડ ફરી પ્રજનન માટે પોતાના ઠંડ પ્રદેશ જવા રવાના થઈ જશે. સુરતમાં જાણે માત્ર ગાંઠીયા ખાવા માટે આ લોકો આવ્યા હોય તેવું લાગે છે.

પક્ષીઓને ગાંઠિયા ન આપો 
આ પક્ષીઓને અપાતા ગાંઠિયા સહિતના ફરસાણ ન આપવા માટે પર્યાવરણપ્રેમીએ અનુરોધ કર્યો હતો. પક્ષીઓ અંગે જાણકારી રાખનાર તજજ્ઞ પર્યાવરણપ્રેમીનું માનવું છે કે, આ પક્ષીઓને સુરતીઓ ગાંઠીયા અને અન્ય સુરતી ખોરાક આપીને પુણ્ય કમાવવાની વાત કરે છે. પરંતુ તેનાથી પક્ષીઓને નુકશાન થઈ રહ્યું છે. જોકે, આવો ખોરાક પક્ષીઓને સહેલાઇથી વધુ પ્રમાણમાં મળી રહે છે.