શિક્ષિકા બની યમદુત, બીજા ધોરણની સ્ટુડન્ટ પર ચડાવી દીધી કાર

પરખ અગ્રવાલ, અંબાજી : અંબાજી નજીક રાણપુર આંબા ગામે એક શિક્ષિકાની કારની અડફેટે વિદ્યાર્થીનીનું મોત નિપજતા ભારે ચકચાર મચી જવા પામી છે. આ ઘટનાની વિગતો જોઈએ તો અંબાજીથી 7 કિલોમીટર દૂર રાણપુર આંબા ગામની પ્રાથમિક શાળાના કમ્પાઉન્ડમાં ખ્યાતિબહેન નામના શિક્ષિકાએ અલ્ટો કાર પુર ઝડપે ચલાવતા આ કાર પાણીની ટાંકી અથડાઈ હતી. આ કારે અકસ્માતે બીજા ધોરણમાં અભ્યાસ કરતી વિદ્યાર્થીનીને અડફેટે લેતા તેનું ઘટના સ્થળે જ મોત નીપજ્યું હતું. 

આ ઘટનામાં અંબાજી પોલીસ ઘટના સ્થળે પહોચી અકસ્માતમાં મૃત્યુ પામેલી વિદ્યાર્થીનીને અંબાજીની જનરલ હોસ્પિટલમાં ખસેડી આગળની કાર્યવાહી હાથ ધરી છે. જોકે આ અકસ્માતના પગલે રાણપુર આંબા પ્રાથમિક શાળા સુમસામ બની છે અને આજે એક પણ શિક્ષક કે વિદ્યાર્થી સ્કૂલમાં ફરકયા નહોતા.

મળતી માહિતી પ્રમાણે રાણપુર આંબા ગામની પ્રાથમિક શાળાની શિક્ષિકા ખ્યાતિબહેન ચાલુ શાળા દરમિયાન જ શાળાનાં પ્રાંગણમાં કાર શીખી રહ્યાં હતા. આ દરમિયાન શિક્ષિકાએ વિદ્યાર્થિનીને અડફેટે લીધી હતી. જેથી વિદ્યાર્થિનીનું ઘટનાસ્થળે જ મોત નીપજ્યું છે. હાલ આ શિક્ષિકા ફરાર થઇ ગઇ છે.