UPLETA ના આ વિસ્તારની પુર પછીની પરિસ્થિતિ જોશો તો આંખમાં આંસુ આવી જશે

ઉપલેટા : શહેરના નાગનાથ ચોક પાસે આવેલ જડેશ્વર નગર વિસ્તારમાં નદી અને વોંકળાના પાણી ઘૂસી જતાં સમગ્ર વિસ્તાર બેટમાં ફેરવાયો હતો. બે દિવસથી સતત વરસી રહેલા વરસાદને લઈને રાજકોટ જિલ્લામાં ઠેર ઠેર તબાહીના દ્રશ્યો સામે આવી રહ્યા છે, ત્યારે ઉપલેટામાં પણ વરસાદના તબાહીના દ્રશ્યો સામે આવી રહ્યા છે. ઉપલેટાના વોર્ડ નંબર 3 માં આવેલ નાગનાથ ચોક પાસેના જડેશ્વર નગર બેટમાં ફેરવાઈ ગયું છે. 

જડેશ્વર નગરના દરેક ઘરમાં પાણી ઘુસી જતા અહીંના લોકો મોટી મુશ્કેલીમાં ફસાઈ ગયા છે. મોજ નદીના તથા વોંકળાના પાણી જડેશ્વર વિસ્તારમાં ચારો તરફ ભરાઈ ગયા હતા. જ્યાં નજર કરો ત્યાં બસ પાણી પાણી જ દૃશ્યમાન થતું હતું. અહીં એક હજાર જેટલા લોકો અહીં રહે છે. ગત રાત્રીના પડેલ વરસાદના પગલે અહીંના તમામ ઘરોમાં પાણી પાણી થઈ ગયા હતા. ઘરમાં ઘુસેલા વરસાદી પાણીને લઈને ઘરોની તમામ ઘરવખરી તબાહ થઈ ગઈ હતી. તમામ અનાજ પલળી ગયું હતું અને લોકો હેરાન પરેશાન થઈ ગયા હતા. 

જડેશ્વર વિસ્તારના ઘણા લોકોએ વરસાદના પુરના આ પાણીના કહેરથી બચવા માટે મકાનની છત ઉપર આશરો લીધો હતો. જોકે એક માળ સુધી પાણી ભરાઈ ગયા હતા. હાલ પણ લોકો તંત્ર દ્વારા કોઈ મદદની રાહ જોઈને બેઠા છે ત્યારે ઉપલેટા નગરપાલિકા દ્વારા અહીંના 800 લોકોને રેસ્ક્યુ કરીને બહાર કાઢવામાં આવ્યા હતા અને નગરપાલિકાની સરકારી શાળાઓમાં આશ્રય આપવામાં આવ્યો હતો. અત્યારે સમગ્ર જડેશ્વર વિસ્તારમાં વીજળી ગુલ થઈ જતા અંધારપટ છવાયો છે.